வாகன தயாரிப்பு நிறுவனமான டாடா மோட்டார்ஸ் மூன்றாம் காலாண்டு லாபம் 96.22 சதவீதம் சரிவைக் கண்டது.
இதுகுறித்து அந்நிறுவனம் வெளியிட்டுள்ள அறிக்கையில் தெரிவித்துள்ளாதவது:
நடப்பு நிதி ஆண்டின் மூன்றாவது காலாண்டில் (அக்டோபர்-டிசம்பர்) டாடா மோட்டார்ஸ் நிறுவனத்தின் விற்பனை ரூ.67,864.95 கோடியாக இருந்தது. கடந்த நிதி ஆண்டின் இதே கால அளவு விற்பனையான ரூ.69,398.07 கோடியுடன் ஒப்பிடுகையில் இது 2.2 சதவீதம் சரிவாகும்.
நிகர லாபம் ரூ.2,952.67 கோடியிலிருந்து 96.22 சதவீதம் வீழ்ச்சியடைந்து ரூ.111.57 கோடியாக காணப்பட்டது.
பிரிட்டனின் ஜாகுவர் லேண்ட் ரோவர் நிறுவன கார் விற்பனையின் மூலம் கிடைத்த லாபம் 62 சதவீதம் வீழ்ச்சி கண்டது. அதே போன்று, உள்நாட்டில் விற்பனை வருவாயும் சரிவடைந்தது.
இவற்றின் காரணமாக, நிகர லாபம் பெருமளவுக்கு வீழ்ச்சி கண்டதாக டாடா மோட்டார்ஸ் அந்த அறிக்கையில் தெரிவித்துள்ளது.