புகை மாசைக் கட்டுப்படுத்தும் தொழில்நுட்பத்தில் அதிக கவனம் செலுத்தி வருவதாக நாட்டின் மிகப்பெரிய கார் தயாரிப்பு நிறுவனமான மாருதி சுஸுகி இந்தியா தெரிவித்துள்ளது.
இதுகுறித்து அந்த நிறுவனத்தின் செயல் இயக்குநர் (பொறியியல் பிரிவு) சி.வி. ராமன் திங்கள்கிழமை வெளியிட்ட அறிக்கையில் தெரிவித்துள்ளதாவது:
கடந்த 2007-08 முதல் கடந்த பத்தாண்டுகளில் மாருதி சுஸுகியின் கார்கள் வெளியிடும் புகையில் காற்றை மாசுபடுத்தும் கார்பன்டயாக்ஸைடு அளவு சராசரியாக 19 சதவீதம் அளவுக்கு கட்டுப்படுத்தப்பட்டுள்ளது.
புகை மாசைக் குறைக்கும் மற்றும் எரிபொருள் திறனை அதிகரிக்கும் அதிநவீன தொழில்நுட்பங்களில் மாருதி சுஸுகி தொடர்ந்து முதலீட்டை அதிகரித்து வருகிறது.
தற்போதுள்ள என்ஜின்கள் புகை மாசைக் கட்டுப்படுத்துவதாகவும், அதிக மைலேஜ் தரவல்லதாகவும் மேம்படுத்தும் பணிகளில் அதிக கவனம் செலுத்தப்பட்டு வருகின்றது என்றார் அவர்.
செலிரியோ (லிட்டருக்கு 27.62கி.மீ) புதிய டிஸையர் (லிட்டருக்கு 28.4கி.மீ), சியாஸ் (லிட்டருக்கு 28.09 கி.மீ) ஆகிய மூன்று மாடல் கார்கள் இந்தியாவில் அதிக எரிபொருள் சிக்கனம் கொண்ட கார்கள் என்ற பெருமையைப் பெற்றுள்ளதாக அந்த அறிக்கையில் தெரிவித்துள்ளது.