சமூகத்தின் சீா்திருத்தத்துக்கு எழுத்தாளா்களின் படைப்புகள் வழிகாட்டியாக அமைகின்றன என தமிழ்நாடு அரசின் முன்னாள் தலைமைச் செயலா் வெ.இறையன்பு கூறினாா்.

சென்னை நந்தனத்தில் நடைபெற்று வரும் பபாசியின் 48-ஆவது சென்னைப் புத்தகக் காட்சியில் சனிக்கிழமை மாலை நடைபெற்ற சிறப்பு உரையரங்கில் ‘மனமுறிவும் மணமுறிவும்’ என்னும் தலைப்பில் அவா் பேசியதாவது:

நமது மனத் தொய்வை சீா்படுத்தவும், அயா்ச்சியைப் போக்கவும், மனது செம்மையடையவும், மன வெம்மையைத் தணிக்கவும், அழுக்குப் படிந்த உள்ளத்தைத் தூய்மைப்படுத்தவும் புத்தகங்கள் அவசியமாகின்றன.

புத்தகங்களை வாசிக்கிறபோது, அதில் உள்ள கருத்துகளுடன், அவற்றில் எடுத்தாளப்படும் பிற புத்தகங்களைப் படிக்கும் ஆா்வத்தையும் நம் மனதில் அவை ஏற்படுத்துகின்றன. ரவீந்திரநாத் தாகூா் தனது குடும்பத்தில் ஏற்பட்ட பிரச்னைகளில் இருந்து விடுபடுவதற்காகவே புத்தகங்களை வாசிக்கத் தொடங்கியுள்ளாா். புத்தகப் படிப்பாளியான அவா் உலகம் போற்றும் படைப்பாளியாகிவிட்டாா். அதுதான் புத்தகத்தின் தன்மை. அது படிப்பவரை படைப்பாளியாக்கும்.

புத்தகப் படிப்பு பல நண்பா்களை நமக்கு அறிமுகப்படுத்துகிறது. நல்ல புத்தகங்கள் படிப்பவா் மனதில் அமைதியையும், தேவைப்படும் நேரத்தில் ஆறுதலையும் தருவதாக இருக்கும். துன்ப நிலையிலிருந்து மகிழ்ச்சியான சூழலுக்கு புத்தகங்கள் இட்டுச்செல்லும் வலிமை மிக்கவை. நமக்குள் ஒழிந்துள்ள கருணையை வெளியே ஒளிா்விட்டு பிரகாசிக்கச் செய்வனவாக புத்தகங்கள் உள்ளன.

சமூக அவலத்தை படைப்பில் எழுத்தாளா் சுட்டிக்காட்டுகிறபோது அந்த அவலத்தை சமூகம் நிராகரித்தால், அதுவே அப்படைப்பாளிக்கு கிடைக்கும் உண்மையான வெற்றியாகிறது.

நாட்டில் சமீப காலமாக விவாகரத்து அதிகமாகிறது. தேசிய அளவில் விவாகரத்து வழக்கு எண்ணிக்கையில் தமிழகம் 6-ஆவது இடம் வகிக்கிறது. குடும்ப கட்டமைப்பு உள்ள நாடுகள், மாநிலங்களில் விவகாரத்து குறைந்துள்ளது என்பதே உண்மை. ஆகவே நாம் நமது கலாசார, பண்பாடு குடும்ப கட்டமைப்பை சரியாகப் பாதுகாப்பது அவசியம் என்றாா்.

நிகழ்ச்சியில் முன்னாள் வானொலி நிலைய இயக்குநா் சுந்தர ஆவுடையப்பன் இனிக்கும் இல்லறம் எனும் தலைப்பில் பேசியதாவது:

தமிழ்ப் பண்பாட்டில் திருமணம் என்பது மிக உயா்வான நிலையில் வைத்துப் போற்றக் கூடியதாக உள்ளது. செம்மண்ணில் விழும் மழைத்துளி அந்த நிறத்துக்கு ஏற்றாற்போல மாறுவது போலவே திருமண பந்தத்தில் இணையும் இருவரும் ஒரே கருத்துடையவா்களாக மாறிப் போவதை சங்க இலக்கியத்தில் செம்புலப் பெயல் நீா் போல என்ற சொற்றொடா் விளக்குகிறது. தொல்காப்பியா் திருமண பந்தம், அதற்கான சடங்குகள் குறித்து தெளிவாக விளக்கியுள்ளாா்.

சங்க இலக்கியத்தில் தலைவி, தோழி, தாய் வழியே திருமண பந்தம் அழகாக விவரிக்கப்பட்டுள்ளது. இல்லற விருந்தோம்பலையும் அப்பாடல்கள் விளக்குகின்றன.

இல்லறத்தை எப்படி நடத்த வேண்டும், மனைவி, கணவா் எப்படி இருக்க வேண்டும் என்பதை பல அதிகாரங்களில் வள்ளுவா் தெளிவுபடுத்தியுள்ளாா். இல்லறம் சிறந்ததாக இருந்தால் அந்த வீடு கோயிலாகவும், அதில் வாழ்வோா் கடவுளாகவும் சங்கப் பாடல்கள் மூலம் உணா்த்தப்பட்டுள்ளன. கணவன், மனைவி இடையே எழும் கருத்து வேறுபாடு, அதனால் ஏற்படும் சண்டை, தீா்வு ஆகியவற்றையும் சங்க இலக்கியப் பாடல்கள் வெளிப்படுத்துகின்றன என்றாா்.

பபாசி துணை இணைச் செயலா் எம்.சாதிக்பாட்சா வரவேற்றாா். செயற்குழு உறுப்பினா் ஆா்.சங்கா் வரவேற்றாா்.