சிட்டி யூனியன் வங்கியின் நடப்பு நிதியாண்டின் மூன்றாம் காலாண்டில் நிகர வட்டி வருமானம் 19 சதவீதம் உயர்ந்து ரூ.365 கோடியாக உள்ளதாக வங்கியின் நிர்வாக இயக்குநர் என்.காமகோடி (படம்) தெரிவித்தார்.
இதுகுறித்து அவர் கூறியதாவது:
நடப்பு நிதியாண்டின் மூன்றாம் காலாண்டில் கடந்தாண்டின் காலாண்டைவிட நிகர வட்டி வருமானம் 19 சதவீதம் உயர்ந்து ரூ. 365.14 கோடியாகவும், நிகர லாபம் 22 சதவீதம் உயர்ந்து ரூ. 154.80 கோடியாகவும் இருந்தது.
நடப்பு நிதியாண்டின் முதல் 9 மாதங்களில் வங்கியின் மொத்த வணிகம் கடந்தாண்டைவிட 11 சதவீதம் உயர்ந்து ரூ. 57,428 கோடியாகி உள்ளது. மேலும் வங்கியின் வைப்புத் தொகை மற்றும் கடன்கள் கடந்தாண்டைவிட முறையே 5 சதவீதம், 20 சதவீதம் உயர்ந்து ரூ. 31,339 கோடியாகவும், ரூ. 26,089 கோடியாகவும் இருந்தது. 561 கிளைகள் மற்றும் 1,584 தானியங்கி பணப் பட்டுவாடா இயந்திரங்களுடன் வங்கி செயல்பட்டு வருகிறது என்றார் அவர்.