புது தில்லி: ஹிந்துஜா குழுமத்தைச் சோ்ந்த பிபிஓ நிறுவனமான ஹிந்துஜா குளோபல் சொல்யூஷன்ஸ் (ஹெச்ஜிஎஸ்) கடந்த மாா்ச் காலாண்டில் ரூ.44.8 கோடி நிகர லாபத்தை ஈட்டியுள்ளது.

இதுகுறித்து அந்த நிறுவனம் பங்குச் சந்தையிடம் கூறியுள்ளதாவது:ஹெச்ஜிஎஸ் நிறுவனம் 2020 மாா்ச் காலாண்டில் ரூ.44.8 கோடி நிகர லாபத்தை ஈட்டியுள்ளது. இது, கடந்த 2019 ஜனவரி-மாா்ச் காலாண்டில் ஈட்டிய நிகர லாபம் ரூ.54.5 கோடியுடன் ஒப்பிடுகையில் 17.8 சதவீதம் குறைவாகும்.

அதேசமயம், இதே காலகட்டத்தில் நிறுவனத்தின் வருவாய் ரூ.1,284.6 கோடியிலிருந்து 2.6 சதவீதம் வளா்ச்சி கண்டு ரூ.1,318.6 கோடியானது.

கடந்த 2019-20 முழு நிதியாண்டில் நிறுவனத்தின் நிகர லாபம் 16.6 சதவீதம் அதிகரித்து ரூ.205.6 கோடியாகவும், நிகர விற்பனை 8.7 சதவீதம் உயா்ந்து ரூ.5,235.4 கோடியாகவும் இருந்தது என ஹிந்துஜா குளோபல் பங்குச் சந்தையிடம் தெரிவித்துள்ளது.