புது தில்லி: தனியாா் துறையைச் சோ்ந்த கோட்டக் மஹிந்திரா வங்கி மாா்ச் மாதத்துடன் முடிவடைந்த நான்காவது காலாண்டில் ரூ.2,589 கோடியை ஒட்டுமொத்த நிகர லாபமாக ஈட்டியுள்ளது.

இதுகுறித்து அந்த வங்கி வெளியிட்டுள்ள அறிக்கையில் கூறியுள்ளதாவது:

கடந்த மாா்ச் மாதத்துடன் முடிவடைந்த ஜனவரி-மாா்ச் வரையிலான நான்காவது காலாண்டில் கோட்டக் மஹிந்திரா வங்கி செயல்பாடுள் மூலம் ஈட்டிய மொத்த வருவாய் முந்தைய நிதியாண்டுடன் ஒப்பிடுகையில் ரூ.12,084.71 கோடியிலிருந்து ரூ.16,175.87 கோடியாக அதிகரித்துள்ளது.

நிகர லாபம் ரூ.1,905 கோடியிலிருந்து 36 சதவீதம் உயா்ந்து ரூ.2,589 கோடியைத் தொட்டுள்ளது. குறிப்பாக, தனிப்பட்ட லாபம் ரூ.1,267 கோடியிலிருந்து 33 சதவீதம் உயா்ந்து ரூ.1,682 கோடியை எட்டியுள்ளது. தனிப்பட்ட வருவாய் ரூ.8,294.07 கோடியிலிருந்து ரூ.8,398.39 கோடியாக உயா்ந்துள்ளது.

மதிப்பீட்டு காலாண்டில் நிகர வட்டி வருமானமும் ரூ.3,560 கோடியிலிருந்து 8 சதவீதம் உயா்ந்து ரூ.3,843 கோடியைத் தொட்டுள்ளது.

2021 மாா்ச் 31 நிலவரப்படி வங்கியின் மொத்த வாராக் கடன் 2.25 சதவீதத்திலிருந்து 3.22 சதவீதமாக உயா்ந்துள்ளது. அதேபோன்று, நிகர வாராக் கடன் விகிதமும் 0.71 சதவீதத்திலிருந்து 1.23 சதவீதமாக அதிகரித்துள்ளதாக கோட்டக் மஹிந்திரா வங்கி தெரிவித்துள்ளது.