திருட்டு பயலே-2 வில் முக்கிய வேடத்தில் அமலாபால்!

சென்னை: இயக்குனர் சுசி கணேசன் இயக்கத்தில் பெரும் வெற்றி பெற்ற  'திருட்டுப் பயலே' படத்தின் இரண்டாம் பாகத்தில் நடிகை அமலா பால் முக்கிய வேடத்தில் நடிக்க இருப்பதாக தெரிய வந்துள்ளது.

சுசி கணேசன் இயக்கத்தில் ஜீவன், சோனியா அகர்வால், அப்பாஸ் மற்றும் மாளவிகா ஆகியோரது நடிப்பில் கடந்த 2006-ஆம் ஆண்டு வெளிவந்த படம் ‘திருட்டுப்பயலே’. கதையின் கருப்பொருளினால் சிறிய சர்ச்சையை உண்டாக்கிய அதேநேரத்தில் வணிக ரீதியாகவும் வெற்றிபெற்றது. தற்போது இந்த படத்தின் இரண்டாம் பாகத்தை எடுக்கப்போவதாக இயக்குனர் சுசி கணேசன் அறிவித்திருந்தார்.

இந்த படத்தில் ஜீவன் நடித்திருந்த கதாபாத்திரத்தில் பாபி சிம்ஹாவும், அப்பாஸ் கதாபாத்திரத்தில் பிரசன்னாவும் நடிக்கவிருப்பதாகவும் சுசி கணேசன் கூறியிருந்தார். அதேபோல் முதல்பாகத்தில் மாளவிகா ஏற்றிருந்த பாத்திரம் எல்லோராலும் கவனிக்கப்பட்ட ஒன்று. அந்த கதாபாத்திரத்தில் எந்த நடிகையை நடிக்க வைக்கலாம் என்பது குறித்து சுசி கணேசன் முடிவெடுக்க இயலாமல் இருந்தார்.

தற்போது மாளவிகா கதாபாத்திரத்தில் நடிக்க அமலாபால் ஒப்பந்தமாகியிருப்பதாக செய்திகள் வெளியாகியுள்ளது. ஏ.ஜி.எஸ். நிறுவனம் சார்பில் இந்த படத்தை கல்பாத்தி அகோரம் தாயரிக்க இருக்கிறார்.