தென்னிந்திய திரையுலகின் லேட் சூப்பர் ஸ்டார் என்று புகழப்படுபவர் நயன்தாரா. தொடர்ந்து கோலிவுட்டின் முன்னணி கதாநாயகியாகவும் திகழ்கிறார். 'அறம்' படத்திற்குப் பிறகு அவரது முக்கியத்துவம் மேலும் அதிகரித்துள்ளது. ஆனால் இந்த வெற்றியும் தனியிடமும் கிடைத்தும், ஹீரோவுக்கு இணையான ஓரிடத்துக்கு உயர்ந்த போதும், கதாநாயகர்களுக்கு முக்கியத்துவம் தரும் படங்களிலும் நடித்து வருகிறார். அவ்வகையில் அஜித்துடன் விசுவாசம் படத்தில் தற்போது நடித்துவருகிறார் நயன்தாரா.

நயன்தாரா ஒரு படத்தை தயாரிக்கவிருக்கிறார் என்ற தகவல் வெளிவந்துள்ளது. இதற்கு முன்னால் அவர் நடிப்பில் வெளிவந்த அறம் படத்தை நயனதாரா தான் தயாரித்தார் என்ற பேச்சு எழுந்தது. ஆனால் அந்தப் படத்தை தயாரித்தவர் நயன்தாராவின் மேனேஜர். தற்போது நயன் தாராவே நேரடியாக இந்தப் புதிய படத்தை தயாரிக்கிறார் என்றும் அந்தப் படத்தை விக்னேஷ் சிவன் இயக்கவிருக்கிறார் என்றும் கோலிவுட்டில் தகவல் பரவியது. ஆனால் அது பொய்யான தகவல் என்றும் தான் புதிய படம் எதனையும் தயாரிக்கப் போவதில்லை என்றும் நயன்தாரா மறுத்துள்ளார்.