வரும் நாள்களில் அவெஞ்சர்ஸ்: எண்ட் கேம் படம் அவதார் படத்தின் வசூலைத் தாண்டி உலகளவில் அதிக வசூலடைந்த படம் என்கிற பெருமையை அடையவுள்ளது. இதற்கு பிரபல இயக்குநர் ஜேம்ஸ் கேமரூன் பாராட்டு தெரிவித்துள்ளார்.
உலகளவில் 2 பில்லியன் டாலர் (ரூ. 13,875 கோடி) வசூலை விரைவாகப் பெற்ற படம் என்கிற பெருமையை சமீபத்தில் அடைந்தது அவெஞ்சர்ஸ்: எண்ட் கேம்.
அவெஞ்சர்ஸ்: இன்பினிட்டி வார் படத்தின் அடுத்தப் பாகமான அவெஞ்சர்ஸ்: எண்ட் கேம் (Avengers: Endgame) படம் அதே படக்குழுவினரால் தற்போது உருவாக்கப்பட்டுள்ளது. ராபர்ட் டெளனி ஜூனியர், கிறிஸ் ஹெம்ஸ்வொர்த், மார்க் ருஃபல்லோ நடிப்பில் ஆந்தோனி ரூஸோ, ஜோ ரூஸோ இயக்கியுள்ளார்கள். ஏப்ரல் 26 அன்று வெளியானது.
இதுவரையிலான 2.18 பில்லியன் டாலர் (ரூ. 15, 121 கோடி) வசூலின் மூலம் உலகளவில் அதிக வசூலை அடைந்த படங்களில் 2-ம் இடத்தைப் பிடித்துள்ளது அவெஞ்சர்ஸ்: எண்ட் கேம் படம். இதன்மூலம் 2.78 பில்லியன் டாலர் (ரூ. 19,282 கோடி) வசூலைப் பெற்று முதலிடத்தில் உள்ள அவதார் படத்தின் இடத்தை விரைவில் அடையவுள்ளது. இதையடுத்து வரும் நாள்களில் புதிய உலக சாதனை நிகழ்த்தப்படவுள்ளது.
11 நாள்களில் டைட்டானிக் படத்தின் ஒட்டுமொத்த வசூலைத் தாண்டியுள்ளது அவெஞ்சர்ஸ்: எண்ட்கேம். மேலும், இதற்கு முன்பு 2 பில்லியன் டாலர் வசூலை 47 நாள்களில் அடைந்த அவதார் படத்தின் சாதனையையும் பின்னுக்குத் தள்ளியுள்ளது. இதன் முந்தைய பாகமான அவெஞ்சர்ஸ்: இன்பினிட்டி வார், படம் வெளியான ஏழு வாரம் கழித்து, உலகளவில் 2 பில்லியன் டாலர் வசூலித்தது.
அவதார், டைட்டானிக், ஸ்டார் வார்ஸ்: தி ஃபோர்ஸ் அவேகன்ஸ் (Star Wars: The Force Awakens), அவெஞ்சர்ஸ்: இன்பினிட்டி வார் ஆகிய நான்கு படங்கள் மட்டுமே 2 பில்லியன் டாலரை வசூலைத் தாண்டிய நிலையில், இந்த வெற்றிக்கோட்டை எட்டிய ஐந்தாவது படம் என்கிற பெருமையைப் பெற்றுள்ளது அவெஞ்சர்ஸ்: எண்ட் கேம்.
இந்நிலையில் அவதார், டைட்டானிக் படங்களின் இயக்குநரான ஜேம்ஸ் கேமரூன், அவெஞ்சர்ஸ் படக்குழுவினருக்குப் பாராட்டுகளைத் தெரிவித்துள்ளார். அவர் கூறியதாவது:
பனிமலை நிஜ டைட்டானிக்கை மூழ்கடித்தது. அவெஞ்சர்ஸ் படம் என்னுடைய டைட்டானிக்கை மூழ்கடித்துள்ளது. லைட்ஸ்டார்ம் எண்டர்டெயிண்மெண்ட் உங்கள் சாதனைகளை வாழ்த்துகிறது. திரையுலகம் உயிர்ப்புடன் இருப்பதை மட்டும் நீங்கள் வெளிப்படுத்தவில்லை, அது முன்னெப்போதையும் விட பெரிதாக உள்ளது என்பதை நிரூபித்துள்ளீர்கள் என்று வாழ்த்தியுள்ளார்.