2020-ம் ஆண்டின் சிறந்த சைவப் பிரியர்களாக நடிகர் சோனு சூட், நடிகை ஷ்ரத்தா கபூர் ஆகியோர் அறிவிக்கப்பட்டுள்ளார்கள்.

பீட்டா இந்தியா அமைப்பு சார்பில் சைவ உணவு குறித்த பிரசார நிகழ்வுகளில் பிரபல பாலிவுட் நடிகர் சோனு சூட் கலந்துகொண்டுள்ளார். சைவ உணவின் மகத்துவம் குறித்து பல தருணங்களில் பேசியுள்ளார். அதேபோல நடிகை ஷ்ரத்தா ஸ்ரீநாத்தும் விலங்குகளுக்காகப் பலவேறு தருணங்களில் குரல் கொடுத்துள்ளார்.

இந்நிலையில் சோனு சூட், ஷ்ரத்தா கபூர் ஆகியோரை 2020-ம் ஆண்டுக்கான சிறந்த சைவப் பிரியர்களாக பீட்டா இந்தியா நிறுவனம் தேர்வு செய்துள்ளது.

சோனு சூட், ஷ்ரத்தா கபூர் ஆகிய இருவரும் சைவ உணவை உட்கொள்ள தங்கள் ரசிகர்களை ஊக்கப்படுத்துகிறார்கள் என்று பீட்டா இந்தியாவின் மக்கள் தொடர்பு இயக்குநர் சச்சின் பாங்கரா கூறியுள்ளார். 

இதற்கு முன்பு - பிரதமர் மோடி, அமிதாப் பச்சன், அனுஷ்கா சர்மா, கங்கனா, ரேகா, சாஹித் கபூர் ஆகியோர் பீட்டா நிறுவனத்தால் சிறந்த சைவப் பிரியர்களாக அறிவிக்கப்பட்டுள்ளார்கள்.