விக்ரம் படத்தில் விஜய் சேதுபதி: வெளியானது முதல் பார்வை போஸ்டர்

கமல்ஹாசன் - இயக்குநர் லோகேஷ் கனகராஜ் கூட்டணியில் உருவாகி வரும் 'விக்ரம்' பட முதல் பார்வை போஸ்டர் மாலை 5 மணிக்கு வெளியானது.

லோகேஷ் கனகராஜ் இயக்கத்தில் கமல்ஹாசன் நடித்து வரும் 'விக்ரம்' பட பெயர் அறிவிப்பு டீஸர் ஏற்கெனவே வெளியாகி படத்தின் மீதான எதிர்பார்ப்பை அதிகரித்தது. அனிருத் இந்த படத்துக்கு இசையமைக்க, 'சர்கார்' உள்ளிட்ட படங்களுக்கு ஒளிப்பதிவு செய்த, கிரிஷ் கங்காதரன் இந்தப் படத்துக்கு ஒளிப்பதிவு செய்து வருகிறார்.

இந்த படத்தில் விஜய் சேதுபதி, ஃபகத் ஃபாசில் உள்ளிட்டோர் நடிக்கின்றனர் என பல தகவல்கள் உலா வந்தன. ஆனால் அவை அனைத்தும் உறுதிப்படுத்தப்படாத தகவல்களாகவே இருந்தன. 

இந்நிலையில் இந்தப் படத்தின் முதல் பார்வை போஸ்டர் வெளியாகி அந்த தகவல்களை உறுதிப்படுத்தியுள்ளது. போஸ்டரில் கமல் நடுவில் இருக்க, இடதுபுறம் விஜய் சேதுபதியும், வலதுபுறம் ஃபகத் ஃபாசிலும் இடம் பெற்றுள்ளனர். 

இந்த போஸ்டர் கமல் ரசிகர்களுக்கு மட்டுமல்லாமல், பொதுவான சினிமா ரசிகர்களையும் வெகுவாகக் கவர்ந்துள்ளது. 

விஜய் சேதுபதி, ஃபகத் ஃபாசில் இருவருமே ஹீரோ, வில்லன் என பல்வேறு பரிணாமங்களில் மிரட்டி வருகின்றனர். அதனால் இவர்களில் யார் வில்லன்? அல்லது கமல்ஹாசன், விஜய் சேதுபதி, ஃபகத் ஃபாசில் உள்ளிட்ட அனைவரும் எதிர்மறை கதாப்பாத்திரங்களில் நடிக்கிறார்களா? என்பது போன்ற விவாதங்களில் ரசிகர்கள் ஈடுபடத் துவங்கியுள்ளனர். 

விரைவில் அந்தக் கேள்விகளுக்கு விடை கிடைக்கும்.