இயக்குநர் ஏ.ஆர்.முருகதாஸ் அடுத்ததாக இரு பெரிய நட்சத்திரங்கள் நடிக்கும் படத்தை இயக்கவிருப்பதாக தகவல் வெளியாகியுள்ளது. 

தீனா, ரமணா, கஜினி, ஏழாம் அறிவு, துப்பாக்கி, கத்தி என வெற்றிப் படங்களைக் கொடுத்தவர் இயக்குநர் ஏ.ஆர்.முருகதாஸ். தமிழ் மட்டுமல்லாமல் தெலுங்கு, ஹிந்தி என அவர் சென்ற இடமெல்லாம் வெற்றிக்கொடி நாட்டினார். 

ஹிந்தியில் ஏ.ஆர்.முருகதாஸ் படங்களுக்கு வரவேற்பு 

குறிப்பாக ஹிந்தியில் கஜினி படத்தை அமீர் கானை வைத்து ரீமேக் செய்தார். அந்தப் படம் ஹிந்தியில் பெரும் வசூல் சாதனையை நிகழ்த்தியது. இந்தப் படத்துக்கு பிறகு நடிகை அசின் பாலிவுட்டிலும் முன்னணி நடிகையாக வலம் வந்தார். 

துப்பாக்கி படத்தை ஹிந்தியில் தி ஹாலிடே என்ற பெயரில் இயக்கி வெற்றிபெற்றார். இதன் காரணமாக ஹிந்தி திரையுலகிலும் ஏ.ஆர்.முருகதாஸின் படங்களுக்கு நல்ல வரவேற்பு இருந்துவருகிறது. 

கைவிடப்பட்ட விஜய் படம் 

இதனையடுத்து தமிழ் மற்றும் தெலுங்கில் இயக்கிய ஸ்பைடர், சர்கார், தர்பார் போன்ற படங்கள் ரசிகர்களை பெரிதும் கவரவில்லை. மேலும் சன் பிக்சர்ஸ் தயாரிப்பில் விஜய் நாயகனாக நடிக்கவிருந்த படத்தை ஏ.ஆர்.முருகதாஸ் இயக்கவிருந்தார். ஆனால் திடீரென அந்தப் படம் கைவிடப்பட்டது. 

ஷாருக்கான் - சல்மான் கானை இயக்கும் ஏ.ஆர்.முருகதாஸ் 

அடுத்ததாக அவர் அனிமேஷன் படம் ஒன்றை இயக்கவிருப்பதாகவும் கூறப்பட்டது. இந்த நிலையில் ஷாருக்கான் - சல்மான் கான் இணைந்து நடிக்கும் படத்தை ஏ.ஆர்.முருகதாஸ் இயக்கவிருக்கிறாராம். முருகதாஸ் சொன்ன கதை இரண்டு நாயகர்களுக்கும் பிடித்துவிட்டதாகவும் இருவரும் இணைந்து நடிக்க சம்மதம் தெரிவித்துவிட்டதாகவும் தகவல் வெளியாகியுள்ளது. 

இதுமட்டுமல்லாமல் இந்தப் படத்தில் ஆமிர் கான் முக்கியமான வேடத்தில் நடிக்கவும் வாய்ப்பிருப்பதாகவும் கூறப்படுகிறது.