கேரளத்தில் அதிக வசூலை அள்ளிய தமிழ்ப் படம் என்கிற புதிய சாதனையை நிகழ்த்தியுள்ளது கமல் ஹாசன் நடித்த விக்ரம் படம்.

லோகேஷ் கனகராஜ் இயக்கத்தில் கமல் ஹாசன், விஜய் சேதுபதி, ஃபஹத் ஃபாசில் நடித்த விக்ரம் படம் ஜூன் 3 அன்று வெளியானது. படம் வெளிவந்த நாள் முதல் ரசிகர்களின் பாராட்டுகளைப் பெற்று வருகிறது. பெரும்பாலான திரையரங்குகளில் அரங்கு நிறைந்த காட்சிகளாக ஓடிக்கொண்டிருக்கிறது. நாளுக்கு நாள் திரையரங்குக் காட்சிகளின் எண்ணிக்கை அதிகமாகி வருவதால் வசூலும் அதிகரித்து வருகிறது. 

இந்நிலையில் கேரளத்தில் இந்தப் படம் புதிய சாதனையை நிகழ்த்தியுள்ளது. வார இறுதி நாள்களில் (வெள்ளி, சனி, ஞாயிறு) ரூ. 15.72 கோடி வசூலித்த விக்ரம் படம், கடந்த இரு நாள்களில் மேலும் ரூ. 6.57 கோடியை வசூலித்துள்ளதாகத் தகவல் வெளியாகியுள்ளது. இதன்மூலம் முதல் ஐந்து நாள்களில் கேரளாவில் மட்டும் ரூ. 22.29 கோடி வசூலித்து புதிய சாதனையை நிகழ்த்தியுள்ளது. கேரளத்தில் அதிக வசூலைப் பெற்ற தமிழ்ப் படம் என்கிற பெருமையை விக்ரம் படம் அடைந்துள்ளது. ரசிகர்களின் வரவேற்பு பலமாக இருப்பதால் கேரளாவில் இன்னும் கூடுதல் வசூலை அள்ளும் என எதிர்பார்க்கப்படுகிறது.