45 ஆண்டுகளுக்கும் மேலாக தமிழின் முன்னணி நடிகராக இருப்பவர் நடிகர் ரஜினிகாந்த். தனக்கென தனி பாணி நடிப்பால் ரசிகர்களை மிகவும் கவர்ந்த அவருக்கு தமிழ்நாடு மட்டுமல்ல, உலக அளவில் கோடிக்கணக்கான ரசிகர்கள் உள்ளனர். 

குறிப்பாக ரஜினிகாந்த்தின் ஒவ்வொரு படம் வெளியாகும்போதும் ஜப்பான் ரசிகர்கள் படம் பார்க்க தமிழகம் வந்துவிடுவார்கள். இப்படி அவருக்கு பல்வேறு நாடுகளில் வெறித்தனமான ரசிகர்கள் இருந்தாலும், அவருக்கு முதன்முதலாக ரசிகர் மன்றம் ஆரம்பித்தவர் மதுரையைச் சேர்ந்த ஏ.பி.முத்துமணி. 

இதையும் படிக்க | மகளிர் நாள்: 100 பெண் திரைக்கதை எழுத்தாளர்களை உருவாக்க நெட்பிளிக்ஸ் திட்டம்

மதுரை மாவட்ட ரஜினி ரசிகர் மன்றத்தின் தலைவராக இருந்து பல்வேறு நலத்திட்ட உதவிகளை வழங்கிவந்துள்ளார். இவரது திருமணமும் நடிகர் ரஜினிகாந்த்தின் வீட்டில்தான் நடந்ததாக கூறப்படுகிறது.

கடந்த 2020 ஆம் ஆண்டு உடல் நலக் குறைவால் அவதிப்பட்டுவந்த ஏ.பி. முத்துமணிக்கு நடிகர் ரஜினிகாந்த் அலைபேசி வாயிலாக தொடர்புகொண்டு அவருக்கும் அவரது குடும்பத்தினருக்கும் ஆறுதல் கூறினாராம்.

இதையும் படிக்க | ''பொண்ணுங்கள மதிக்க என் பசங்களுக்கு கத்துக்கொடுத்துருக்கேன்'': ஐஸ்வர்யா ரஜினிகாந்த்தின் பதிவு வைரல்!

இந்த நிலையில் கடந்த சில நாட்களாக உடல்நலக் குறைவால் மருத்துவமனையில் சிகிச்சைபெற்றுவந்த முத்துமணி, சிகிச்சை பலனின்றி உயிரிழந்தார். அவருக்கு வயது 63. அவருக்கு ரஜினி ரசிகர்கள் இரங்கல் தெரிவித்து வருகின்றனர்.