கைதி படத்தின் மூலம் பிரபலமான நடிகர் அர்ஜுன் தாஸ். பின்னர் மாஸ்டர், அந்தகாரம் படங்களில் நடித்தார். விக்ரம் படத்திலும் கிளைமாக்ஸில் சிறப்பு தோற்றத்தில் நடித்திருப்பார். ஹிந்தி படமொன்றிலும் நடித்து வருகிறார். 

பாவக்கதைகள் இணையத் தொடரில் தங்கம் என்ற கதையில் சதார் என்ற திருநங்கையாக நடித்து அசத்தினார் காளிதாஸ் ஜெயராம். அந்தத் தொடர் அவருக்கு நல்ல நடிகர் என்ற பெயரைப் பெற்றுத்தந்தது. லோகேஷ் இயக்கத்தில் பெரும் வெற்றிபெற்ற விக்ரம் படத்தில் கமலின் மகனாக நடித்திருந்தார். 

மேலும் பா.ரஞ்சித் இயக்கத்தில் சமீபத்தில் வெளியான நட்சத்திரம் நகர்கிறது படத்திலும் காளிதாஸின் நடிப்பு கவனம் ஈர்த்தது. 

தற்போது  டேவிட், சோலோ படங்களின் மூலம் கவனம் பெற்றவர் இயக்குநர் பிஜோய் நம்பியார். இவரது இயக்கத்தில் இவர்கள் இருவரும் சேர்ந்து ‘போர்’ எனும் படத்தில் நடித்து வருகின்றனர். இந்தப் படத்தின் படப்பிடிப்பு முடிவடைந்துள்ளது. இது தமிழ் மற்றும் ஹிந்தியில் ஒரேசமயத்தில் படமாக்கப்பட்டு வந்தது குறிப்பிடத்தக்கது. 

இந்தப் படத்தில் சஞ்சனா நடராஜன் நடித்துள்ளார். சார்பட்டா பரம்பரை படத்தில் இவரது நடிப்பு சிறப்பாக இருந்தது. விரைவில் ரிலீஸ் தேதி அறிவிக்கப்படுமென எதிர்பார்க்கப்படுகிறது.