தமிழ்த் திரையுலகில் ‘பரியேறும் பெருமாள்’ என்கிற தனது முதல் படத்திலேயே அழுத்தமான படைப்பாளியாக அனைவராலும் பாராட்டப்பட்டவர் இயக்குநர் மாரி செல்வராஜ். 

பரியேறும் பெருமாள், கர்ணன், மாமன்னன் ஆகிய படங்களுக்கு அடுத்ததாக நான்காவது திரைப்படமாக வாழை படத்தினை, அவரே தயாரித்து இயக்கியுள்ளார்.

சிறுவர்கள் முதன்மைக் கதாபாத்திரத்தில் நடிக்க சிறுவர் சினிமாவாக இப்படம் உருவாகிறது. மேலும் இப்படத்தில் கலையரசன், நிகிலா விமல், திவ்யா துரைசாமி, வெயில் படப்புகழ் பிரியங்கா போன்றோரும் நடிக்கிறார்கள். இப்படத்திற்கு சந்தோஷ் நாராயணன் இசையமைக்கிறார். தேனி ஈஸ்வர் ஒளிப்பதிவு. 

நடிகர் உதயநிதி ஸ்டாலினின் கடைசி படமாக மாமன்னன் படம் அமைந்தது. விமர்சன ரீதியாக கலவையான விமர்சனமும் வசூல் ரீதியாக நல்ல வரவேற்பினையும் பெற்றது மாமன்னன் திரைப்படம். இந்தப் படத்துடன் நடிப்புக்கு ஓய்வை தெரிவித்து அமைச்சராக தனது பணியை தொடர்கிறார் உதயநிதி. 

அமைச்சர் உதயநிதி ஸ்டாலின் பிறந்தநாளை முன்னிட்டு இயக்குநர் மாரி செல்வராஜ் தனது எக்ஸ் வலைதளப் பதிவில், “இனிய பிறந்த நாள் வாழ்த்துகள் உதயநிதி ஸ்டாலின் சார். உங்கள் இலக்குகள் அத்தனையும் உங்கள் தீரா புன்னகையின் வழி சாத்தியமாகட்டும். மாமன்னன்” என வாழ்த்து தெரிவித்துள்ளார்.