இளைஞர்களிடையே பெரும் வரவேற்பைப் பெற்ற மோதலும் காதலும் தொடர் முடிவுக்கு வந்தது. இறுதிக்கட்ட காட்சியிடன் இந்தத் தொடர் 304 நாள்கள் ஒளிபரப்பானது.

விஜய் தொலைக்காட்சியில் திங்கள் முதல் வெள்ளி வரை மாலை 6 மணிக்கு மோதலும் காதலும் தொடர் ஒளிபரப்பாகி வந்தது.

நாயகியாக அஸ்வதியும் (வேதா), நாயகனாக சமீர் அகமதுவும் (விக்ரம்) நடித்த இந்தத் தொடர், இளைய தலைமுறையினரிடையே மிகுந்த வரவேபைப் பெற்றது. இவர்களுக்கு இடையிலான காதல் காட்சிகள் இன்ஸ்டாகிராம் போன்ற சமூக வலைதளப் பக்கங்களில் அதிக வரவேற்பைப் பெற்றன.

பள்ளி செல்லும் பெண் குழந்தையுடன் இருக்கும் விவாகரத்து ஆன ஆண் தொழிலதிபர் மற்றும் குழந்தைகள் நல பெண் மருத்துவர் இடையே நடக்கும் கதைதான் மோதலும் காதலும்.

காதலுக்கு முக்கியத்துவம் கொடுத்து எடுக்கப்பட்ட இந்தத் தொடரில் விக்ரம், வேதா ஆகிய இருவருக்கு இடையேயான மோதல் நிறைந்த காதல் காட்சிகளும், பின்னர் குழந்தைக்காக சமசரசம் செய்துகொள்ளும் காட்சிகளும் பல ரசிகர்களைக் கவர்ந்தது.

கடந்த ஆண்டு எப்ரல் மாதம் முதல் ஒளிபரப்பான இந்தத் தொடர் 304 எபிஸோடுகளுடன் முடிவடைந்துள்ளது.

நாயகி அஸ்வதிக்கு மோதலும் காதலும் தொடரில் நடித்ததன் மூலம் மிகப்பெரிய ரசிகர் பட்டாளம் உருவாகியுள்ளது. 2021ஆம் ஆண்டு மலையாளத் தொடரில் நடித்ததன் மூலம் சின்னத்திரையில் அறிமுகமானாலும், பல நிகழ்ச்சிகளை தொகுத்து வழங்கியிருந்தாலும் மோதலும் காதலும் தொடரின் மூலமே தற்போது நட்சத்திர தகுதியைப் பெற்றுள்ளார்.