நடிகர் சந்தானம் நடிப்பில் வெளியான ‘வடக்குப்பட்டி ராமசாமி’ படம் கலவையான விமர்சனங்களைப் பெற்றது. தொடர்ந்து, ‘இந்தியா பாகிஸ்தான்’ படத்தின் இயக்குநர் ஆனந்த் நாராயண் இயக்கத்தில் ‘இங்க நான்தான் கிங்கு’ படத்தில் சந்தானம் நடித்து முடித்துள்ளார்.

நடிகை பிரியாலயா இப்படத்தின் மூலம் கதாநாயகியாக அறிமுகமாகிறார். மேலும், இப்படத்தில் தம்பி ராமையா, முனிஸ்காந்த், பால சரவணன் உள்ளிட்டோர் நடித்துள்ளனர்.

இங்க நான்தான் கிங்கு திரைப்படம் வெள்ளிக்கிழமை திரையரங்குகளில் வெளியானது.

இப்படம் கலவையான விமர்சனங்களைப் பெற்றாலும் வரவேற்பைப் பெற்றுள்ளது. இந்த நிலையில், முதல்நாள் வசூலாக ரூ.1.5 கோடியை ஈட்டியுள்ளதாகத் தகவல். இறுதியாக வெளியான சந்தானத்தின் திரைப்படங்கள் வசூல் ரீதியான வெற்றியைப் பெற்றதால், இப்படமும் வெற்றி பெறலாம் என எதிர்பார்க்கப்படுகிறது.