நடிகர் ஆர்ஜே பாலாஜி நடிக்கும் புதிய படமான ஹேப்பி எண்டிங் திரைப்படத்தின் முதற்பார்வை டீசர் இன்று வெளியாகியுள்ளது.

ஆர்ஜேவாக இருந்து தற்போது இயக்குநராகவும், நடிகராகவும் அறியப்படுபவர் ஆர்ஜே பாலாஜி. நயன்தாரா நடிப்பில் இவர் இயக்கிய மூக்குத்தி அம்மன் திரைப்படம் நல்ல வரவேற்பைப் பெற்றது.

இவர் அடுத்ததாக, நடிகர் சூர்யாவின் 45-வது படத்தை இயக்க உள்ளார். இதற்கிடையே, அறிமுக இயக்குநர் சித்தார்த் விஸ்வநாத் இயக்கத்தில் சொர்க்கவாசல் என்கிற படத்திலும் ஆர்ஜே பாலாஜி நடித்துள்ளார்.

சொர்க்கவாசல் திரைப்படத்தின் டீசர் கடந்த வாரம் வெளியாகி கவனத்தைப் பெற்றது.

இந்த நிலையில், அவர் நடிக்கும் அடுத்த படமான ‘ஹேப்பி எண்டிங்’ திரைப்படத்தின் டைட்டில் முதற்பார்வை டீசர் இன்று வெளியாகியுள்ளது.

இந்தப் படத்தை அறிமுக இயக்குநர் அம்மமுத்து சூர்யா இயக்கியுள்ளார். மில்லியன் டாலர் ஸ்டுடியோஸ் மற்றும் எம்ஆர்பி எண்டர்டெயின்மெண்ட் நிறுவனங்கள் இணைந்து தயாரிக்கின்றன.

ரொமாண்டிக் காமெடி ஜானரில் உருவாகும் இந்தப் படத்திற்கு ஷான் ரோல்டன் இசையமைக்கிறார்.