பிரபஞ்சத்தில் உயிரினங்கள் வாழ்வதற்குரிய ஒரே இடம் பூமி. அதைப் பாதுகாப்பது தொடர்பான விழிப்புணர்வு ஏற்படுத்த ஒவ்வொரு ஆண்டும், ஏப்ரல் 22-ஆம் தேதி பூமி தினம் கடைப்பிடிக்கப்படுகிறது. கடந்த ஆண்டு "எங்கள் சக்தி, எங்கள் கிரகம்' என்ற கருப்பொருளுடன் பூமி தினம் கொண்டாடப்பட்டது. அதாவது, பூமியில் வற்றாது கிடைக்கும் ஆற்றல்களைக் கொண்டு பூமியைப் பாதுகாக்க வேண்டும் என்பது இதன் உட்கருத்தாகும்.

நம் ஆற்றல் தேவைக்கு நிலக்கரி, பெட்ரோலியப் பொருள்கள் உள்ளிட்ட புதைபடிவ எரிபொருள்களைப் பயன்படுத்துகிறோம். இவை வெளியேற்றும் பசுமை இல்ல வாயுக்கள், புவி வெப்பமடைதலுக்கு நேரடியாகப் பங்களிக்கின்றன. சுற்றுச்சூழல் சீரழிவை ஏற்படுத்துகின்றன.

சூரியன், காற்று, நீர், புவிவெப்பம், உயிரிஆற்றல் மற்றும் கடல் அலைகள் போன்றவை புதுப்பிக்கத்தக்க ஆற்றலை அளிக்கின்றன. இவை தீர்ந்துபோகாதவை மற்றும் ஆண்டு முழுவதும் கிடைக்கக் கூடியவை. உலகின் மொத்த எரிசக்தி நுகர்வில், இந்தியா 5-ஆவது இடத்தில் உள்ளது. எரிசக்தித் தேவைகள் ஆண்டுக்கு 3 சதவீதம் அதிகரித்து வருகிறது. நாட்டின் மின்சார உற்பத்தியில் நிலக்கரியின் பங்கு 74 சதவீமாகும். இது சுற்றுச்சூழலுக்கு உகந்ததல்ல; நாம் புதுப்பிக்கத்தக்க எரிசக்தி மற்றும் தொழில்நுட்பங்களை நோக்கிச் செல்ல வேண்டியதுஅவசியம். 2070-க்குள் இந்தியா பூஜ்ஜிய கார்பன் உமிழ்வு என்கிற நிலையை அடைந்துவிடும் என்று பிரதமர் மோடி உறுதி அளித்திருக்கிறார்.

சூரியசக்தி, காற்றாலை, உயிரி எரிசக்தி, புவிவெப்ப ஆற்றல், பெருங்கடல் ஆற்றல், அலை ஆற்றல், ஓடிஇசி (இது கடலின் சூடான மேற்பரப்பு நீர் மற்றும் குளிர்ந்த ஆழமான நீர்ஆகியவற்றுக்கு இடையேயான வெப்பநிலை வேறுபாட்டிலிருந்து பெறப்படும் ஆற்றல்) போன்றவை மூலம் இந்தியா, புதிப்பிக்கத்தக்க ஆற்றலை பெறுவதற்கான வாய்ப்புகள் உள்ளன.

இந்த மரபுசாரா எரிசக்தித் துறையை ஊக்குவிக்கும் வகையில், பயனுள்ள கொள்கைகள் மற்றும் ஒழுங்குமுறைகளை உருவாக்கி செயல்படுத்துதல் அவசியமாகும். புதைபடிவ எரிபொருள்கள் பயன்பாட்டால் பூமியில் ஏற்பட்டுள்ள காலநிலை மாற்றங்களால், அதிக பாதிப்புக்கு உள்ளாகக் கூடிய நாடுகளின் பட்டியலில் இந்தியா 7-ஆவது இடத்தில் உள்ளது. இது உலக வங்கியின் கூற்றுப்படி, இந்தியாவின்140 கோடி மக்கள்தொகையில், 80%-க்கும் அதிகமானோர் காலநிலை மாற்றத்தால் ஏற்படும் பேரழிவுகளால் பாதிக்கப்படக்கூடிய பகுதிகளில் வாழ்கின்றனர் என்று கணிக்க முடிகிறது.

ஆஸ்திரேலியாவில் மூன்றில் ஒரு பங்கு வீடுகள் ஏற்கெனவே சூரிய சக்தியைப் பயன்படுத்துகின்றன. ஐஸ்லாந்து, நார்வே மற்றும் எத்தியோப்பியா ஆகிய நாடுகளில் பெரும்பாலான ஆற்றல் தேவைகள் புதுப்பிக்கத்தக்க எரிசக்தியால் பெறப்படுகின்றன. உருகுவே அதன் மின்சாரத்தில் 98% புதுப்பிக்கத்தக்க எரிசக்தி ஆதாரங்களில் இருந்து உற்பத்தி செய்கிறது. டென்மார்க்கில், 50%-க்கும் அதிகமான மின்சாரம் காற்றாலைகள் மூலம் உற்பத்தி செய்யப்படுகிறது.

ஆப்பிரிக்காவின் கென்யா அதன் மின்சார உற்பத்தியில் கிட்டத்தட்ட பாதியை புவி வெப்பம் மூலம் பெறுகிறது. அமெரிக்காவில் உற்பத்தி செய்யப்படும் மின்சாரத்தில் புதுப்பிக்கத்தக்க ஆற்றல் கிட்டத்தட்ட 25% ஆகும். இவை இன்னும் பத்து ஆண்டுகளுக்குள் 90 %-ஆக உயரும் என்று கணித்துள்ளனர்.

சூரியனில் இருந்து வரும் கதிரியக்க ஒளி, வெப்ப ஆற்றல் சூரிய சேகரிப்பான்கள் மூலம் பயன்படுத்தப்படுகின்றன. இவை ஒளிமின்னழுத்தங்கள், செறிவுஒளி மின்னழுத்தங்கள், சூரியவெப்பமாக்கல், செறிவூட்டப்பட்ட சூரிய சக்தி, செயற்கை ஒளிச்சேர்க்கை மற்றும் சூரியகட்டமைப்பு போன்ற பல்வேறு வகைகளில் உள்ளன. இந்த சேகரிக்கப்பட்ட சூரிய ஆற்றல் பின்னர் ஒளி, வெப்பம் மற்றும் பல்வேறு வகையான மின்சாரத்தை வழங்கப் பயன்படுகிறது.

காற்றிலிருந்து நாம்பெறும் ஆற்றல் காற்றாலை ஆற்றல் என்று அழைக்கப்படுகிறது. காற்று மின்சாரம் தயாரிக்க அனுமதிக்கும் பெரிய உயரமான காற்றாலைகளை பயன்படுத்துகிறோம். பூமியின் மேற்பரப்பில் உள்ள இயற்கையான காற்றோட்டம் காற்றாலைகளை இயக்கப் பயன்படுகிறது. நவீன கால காற்றாலை விசையாழிகள் சுமார் 600 கிலோவாட் முதல் 5 மெகாவாட் வரை இருக்கும், வணிகநோக்கங்களுக்காக இவை 1.5 முதல் 3 மெகாவாட் வரை வெளியீட்டு சக்தியுடன் மதிப்பிடப்படுகின்றன.

புள்ளிவிவரங்களின்படி, நீர் மின்சாரம் உலகளாவிய எரிசக்தி வளங்களில் சுமார் 16.6%-ஐ உருவாக்குகிறது மற்றும் புதுப்பிக்கத்தக்க மின்சாரத்தில் சுமார் 70% ஆகும். இந்த ஆற்றல் பாயும் நீரில் அணைகள் மற்றும் நீர்த்தேக்கங்களை நிர்மாணிப்பதன் மூலம் உருவாக்கப்படும் மற்றொரு மாற்று ஆற்றல் மூலமாகும்; பாயும் நீரிலிருந்து இயக்க ஆற்றல் மின்சாரம் உற்பத்தி செய்யும் விசையாழிகளை இயக்கப் பயன்படுகிறது.

டைடல் சக்தி அலைகளின் ஆற்றலையும், கடல் அலைகளின் மேற்பரப்பில் இருந்து ஆற்றலைப் பிடித்து மின் உற்பத்திக்காக அலைசக்தியையும் மாற்றுகிறது. இந்த இரண்டு வகையான நீர் மின்சாரமும் மின் உற்பத்தியில் மிகப் பெரிய ஆற்றலைக் கொண்டுள்ளன.

பூமியில் சேமிக்கப்படும் வெப்ப ஆற்றலில் இருந்து உருவாக்கப்படும் ஆற்றலே புவிவெப்ப ஆற்றல் ஆகும். வெப்ப நீரூற்றுகள் மற்றும் எரிமலைகள் போன்ற மூலங்களிலிருந்து வெப்ப ஆற்றல் கைப்பற்றப்படுகிறது,. மேலும், இந்த வெப்பம் தண்ணீரை சூடாக்குவதற்கும் பிற நோக்கங்களுக்காகவும் தொழிற்சாலைகளால் நேரடியாகப் பயன்படுத்தப்படுகிறது.

இந்த வகை ஆற்றல் உயிரி எரிபொருளிலிருந்து பெறப்படுகிறது, இது உயிரினங்கள் மற்றும் தாவரங்களிலிருந்து பெறப்பட்ட பொருள்களிலிருந்து பெறப்பட்ட ஒருவகை உயிரியல் பொருளாகும், இது லிக்னோ செல்லுலோ பயோமாஸ் என்று அழைக்கப்படுகிறது.

உயிரி எரிபொருளை நேரடியாக எரிப்பு மூலம் வெப்பத்தை உற்பத்தி செய்யலாம் மற்றும் மறைமுகமாக அதை உயிரி எரிபொருளாக மாற்றிப் பயன்படுத்தலாம். உயிரி எரிபொருளை எத்தனால், பயோடீசல் மற்றும் மீத்தேன் வாயு போன்ற போக்குவரத்து எரிபொருள்கள் போன்ற பிற பயன்படுத்தக்கூடிய ஆற்றலாக மாற்றலாம்.

எனவே, மரபுசாரா எரிசக்தி ஆற்றலை நோக்கி நாம் நகர வேண்டியது அவசியமாகிறது. ஏனென்றால், கால நிலை மாற்றத்தால் ஏற்படும் விளைவுகள் நமக்காகக் காத்திருக்காது. நம்மை விட்டு விலகியும்செல்லாது என்ற புரிதல் நமக்கு வேண்டும்.