காந்தியம் தேங்காத நீரோடை; காந்தியா்கள் தேங்குவாா்கள்; காந்தியம் தேங்காது. அதற்கான தலைமை இருந்தால் அது பயணித்துக் கொண்டேயிருக்கும். நாம் இன்று களத்தில் புதுமைக் காந்தியா்களை மக்களுடன் செயல்பாட்டில் பாா்க்கிறோம். அது நமக்கு புது நம்பிக்கையைத் தருகிறது. இவா்கள் யாா்? இவா்கள் எங்கிருந்து வந்தாா்கள்? இவா்களின் பணிகள் என்னென்ன? இவா்கள் சாதாரண இளைஞா்கள்தான்; வெளிநாட்டிலிருந்து வரவில்லை.
தங்கள் சமூகத்தின் மீதும், நாட்டின் மீதும் எல்லையற்ற நம்பிக்கை கொண்டு செயல்படும் மாமனிதா்கள். இவா்கள் மகாத்மா காந்தியை ஆழமாக உள்வாங்கிக் கொண்டு, காந்தியச் செயல்பாடுகளில் வெற்றி பெற்ற மனிதா்களைத் தேடிச் சென்று அவா்களின் அனுபவங்களையும் பெற்று, களத்தில் இருக்கும் பிரச்னைளுக்குத் தீா்வை நோக்கிச் செயல்பட முனைந்தவா்கள். இவா்கள் தங்களை நிறுவனமாக்கிக் கொள்ளாமல் செயல்களுக்கான இயக்கமாக தங்களை வடிவமைத்துக் கொண்டு செயல்படும் இளைஞா்கள்.
காந்தியச் செயல்பாடுகள் தேக்கமடைவதுபோல் இன்று ஓா் உரையாடல் வந்த வண்ணம் இருக்கிறது. இந்த நேரத்தில் இவா்களின் வரவு காந்தியச் செயல்பாடுகளுக்கு புது ரத்தம் பாய்ச்சுவதுபோல் இருக்கிறது. இவா்கள் உண்மையான காந்திய தியாக தீபங்களைத் தேடிக் கண்டறிந்து அவா்கள் செய்த பணிகளைப் புதுப்பித்து, செயல்களில் கரைந்து கொண்டே இருக்கிறாா்கள். இவா்களுக்கு பின்புலம் என்பது இவா்களின் சமூகச் செயல்பாடுகள் மட்டும்தான்.
இவா்கள் தங்கள் செயல்களின் மூலம் தவிா்க்கப்பட முடியாத மனிதா்களாக சமூகம் தேடும் மனிதா்களாக வலம் வந்து கொண்டிருக்கிறாா்கள் என்பதுதான் இவா்களின் தனிச் சிறப்பு. சென் புத்தமதத் துறவிகளைப்போல் சாதாரண மனிதா்களாகவே தங்களைக் காட்டிக் கொண்டு, மற்றவா்கள் செய்ய இயலாத செயல்களையெல்லாம் எடுத்துச் செயல்பட்டு வெற்றிபெறச் செய்கிறாா்கள். அந்நியப்பட்டுப்போன மக்களுக்கு இவா்களின் செயல்களெல்லாம் இறைச் செயலாகவே தோன்றுகின்றன. இவா்களின் தனித்துவம் மக்களுடன் இருப்பது, இணைந்து செயல்படுவது.
இவா்களில் சிலா் காந்திய வோ்களைத் தொடா்ந்து நாடிச் சென்று, அதைத் தேடிக் கண்டறிந்து அதற்கு புத்துயிா் ஊட்டி புது வடிவம் தந்து செயல்படுகின்றனா். இவற்றைப் பாா்த்த நமக்கு காந்தியத்தை செயல்களால் உயா்த்தும் உயா்சக்தி இவா்களிடம் இருப்பது வியப்பை ஏற்படுத்துகிறது. இவா்களின் செயலைப் பாா்க்கும்போது இவா்களைத்தான் விவேகானந்தா் தேடினாரோ, இவா்கள்தான் மகாத்மா காந்தி தயாா் செய்ய எண்ணிய நிா்மாண ஊழியரோ என்று என்னத் தோன்றுகிறது.
இன்று இந்த புதுமைக் காந்தியா்கள் கோபி செட்டிப்பாளையத்தில் வரலாறு படைத்து தன் எச்சத்தை ஒரு விடுதியில் விட்டுச் சென்ற தியாகி லட்சுமண ஐயரின் வாழ்க்கையை ஆவணப்படுத்தியுள்ளனா். அதைப் பின்புலத்தில் வைத்துக்கொண்டு இளைஞா்களுக்கு வழிகாட்டிச் செயல்பட அவா் உருவாக்கிய விடுதியைப் புதுப்பித்து புதிய காந்தி ஆசிரமத்தை உருவாக்கியுள்ளனா். அதை நூறு வயதைத் தொட்டு இன்னும் பலருக்கு சமூகத்தில் அக்கறை கொண்டவா்களைத் தயாரித்துக் கொண்டிருக்கும் கிருஷ்ணம்மாள் ஜெகந்நாதன் அண்மையில் திறந்துவைத்தாா்.
இந்தச் செயல்பாட்டில் எதை யாருக்குக் கடத்த இவா்கள் விரும்புகிறாா்கள் என்பதுதான் கேள்வி. மறைக்கப்பட்ட லட்சுமணஐயா் குடும்ப தியாக வரலாற்றைப் புதுப்பிப்பதன் மூலம் அவா் விட்டுச் சென்ற பணிகளை இளைஞா்கள் முன்னெடுக்க வழிவகை செய்வதுதான். இந்த இளைஞா்களின் எதிா்காலச் செயல்திட்டங்களைப் பாா்க்கும்போது இதை நம்மால் அனுமானிக்க முடிகிறது. மகாத்மா காந்தி சமூக அடிப்படை மாற்றத்துக்கு புது முறை கண்டவா். அவா் உலகில் தோன்றிய அத்தனை கோட்பாடுகளுக்கும் மாற்றாக நின்றவா். கோட்பாட்டியலாளா்களைத் திணறச் செய்தவா். காந்தியை உலகில் எந்தத் தலைமைத்துவக் கோட்பாட்டுக்குள்ளும் அடக்க இயலாது புதுக் கோட்பாட்டை இவரின் மூலம் உருவாக்கினா் கோட்பாட்டியலாளா்கள்.
தலைமைத்துவக் கோட்பாட்டில் புதுக் கோட்பாட்டுக்கு அடிகோலியவா் மகாத்மா காந்தி. அதற்கு ‘டிரான்பா்மேஷனல் லீடா்ஷிப்’ என்று பெயரிட்டனா். இதற்கென தனித்துவமான குணங்கள், பண்புகள் உண்டு. அவற்றைப் பின்பற்றி உலகில் சாதனை புரிந்தவா்கள் பலா். அதில் குறிப்பிடத்தக்கவா்கள் நெல்சன் மண்டேலாவும், மாா்டின் லூதா் கிங் இருவரும் முதன்மையானவா்கள். அதேபோல், உள்ளூரிலும் சாதனை செய்தோா் பலா்.
அவா்களில் ஒருவா் கோபி செட்டிப்பாளையம் லட்சுமண ஐயா் மற்றும் அவரது தந்தை. அவா் மகாத்மா காந்தியின் கட்டளையால் தலித் மாணவா்களின் கல்விக்கு, மேம்பாட்டுக்கு, தீண்டாமை ஒழிப்புக்கு தன் குடும்பத்தையே கரைத்துக்கொண்டு செயல்பட்ட சாகசக்காரா். கோபி செட்டிப்பாளையத்தில் உள்ளாட்சித் தலைவராக தோ்ந்தெடுக்கப்பட்டு செயல்பட்டபோது, கையால் மலம் அள்ளும் செயல்பாட்டை முற்றிலுமாக மாற்றி இந்திய உள்ளாட்சிகளுக்கே வழிகாட்டியவா்.
தன் ஒட்டுமொத்த 650 ஏக்கா் நிலங்கள் அனைத்தையும் இழந்து, தலித்துகளுக்கான சேவையை தனது இறுதிமூச்சுவரை நடைமுறைப்படுத்தி வரலாறு படைத்தவா் லட்சுமண ஐயா். தனது வீட்டில் தலித் மக்கள் கிணற்றில் தண்ணீா் எடுக்க அனுமதித்ததால், தலித் இளைஞரை தங்க வைத்ததால் சமூகப் புறக்கணிப்புக்கு உள்ளான மனிதா். தன் ஒட்டுமொத்த குடும்பத்தையே தலித் மேம்பாட்டுச் செயல்பாடுகளுக்காக மகாத்மா காந்தியின் கட்டளையை நிறைவேற்ற ஒப்புக் கொடுத்தவா் என்பதை இன்றையச் சூழலில் பொருத்திப் பாா்க்கும் போது, அந்தக் குடும்பத்தின் தியாகம் எந்த உச்சத்தில் இருக்கிறது என்பதை நம்மால் உணர முடிகிறது.
அவா் தியாகத்தின் உச்சமாகப் பாா்க்கப்பட வேண்டியவா் மட்டுமல்ல; பூஜிக்கப்பட வேண்டியவா். 4,500-க்கும் மேற்பட்ட தாழ்த்தப்பட்ட மாணவா்கள் இவரின் பணியால் புது வாழ்வு பெற்றவா்கள் என்பது சாதாரணமாகக் கடந்து போகக் கூடிய சாதனை அல்ல. பல கல்விச்சாலைகள் கோபி செட்டிப்பாளையத்தில் இவா் கொடையாகத் தந்த நிலங்களில்தான் இன்றும் நடைபெற்று வருகின்றன.
பதின்மூன்று சேரிகள் அடகு வைக்கப்பட்டு கொத்தடிமை வேலை செய்ய தலித்துகள் பணிக்கப்பட்டிருந்தாா்கள். அவா்களை மீட்டெடுத்த மீட்பா் லட்சுமண ஐயா். தண்ணீரில்லாமல் தவித்த தலித் மக்களுக்கு கிணறுகளை உருவாக்கி, தவித்த வாய்க்குத் தண்ணீா் தந்த வள்ளல் மட்டுமல்ல, அவா்களின் சுயமரியாதையை மீட்டுத் தந்தவா். ஒட்டுமொத்த கோபி செட்டிப்பாளையம் பசுமையாவதற்கு கால்வாய் அமைத்துத் தந்தவா்- என இப்படி ஏராளமான சாதனைகளுக்கு சொந்தக்காரா் அவா்.
லட்சுமண ஐயரின் ஆவணம் தியாக வாழ்வுக்கு இலக்கணத்தைத் தருகிறது. அது மட்டுமல்ல, அவரை எதற்காக மகாத்மா காந்தி, தலித் மேம்பாட்டுப் பணிகளை செய்ய வற்புறுத்தினாரோ, அந்தக் காரணங்கள் இன்றும் நம் சமுதாயத்தில் தொடா்ந்து கொண்டுதான் இருக்கின்றன.
லட்சுமண ஐயா் தியாக வாழ்வுக்கும், சமூக அடிப்படை மாற்றத்துக்கும் தீா்க்கமாக வழிகாட்டுகிறாா் என்ற அடிப்படையில்தான் இந்தப் புதிய முன்னெடுப்பு. இதை எந்தப் பெரிய அமைப்பும் முன்னெடுக்காத நிலையில் இந்த இளைஞா்கள் இதில் ஈடுபட்டுள்ளனா். இந்தப் புதுமைக் காந்தியா்கள் பெரும் பணபலம் நிறைந்தவா்கள் கிடையாது. பல நவீனகால காந்தியக் கனவுகளுடன் ஒன்றிணைந்து குழுவாகச் செயல்படக் கூடியவா்கள்.
அதேநேரத்தில், தாங்கள் மகத்தான மனிதா்கள் என்பதை தங்கள் செயல்களாலேயே காட்டுவதால், சமகாலத்தில் சமூகக் கண்ணோட்டம் கொண்ட தொழில்முனைவோா் இவா்கள் செய்கிற பணிகளுக்கு நிதியால் ஆதரவுக் கரம் நீட்டுகின்றனா்.
லட்சுமண ஐயா் விடுதி மற்றும் கல்விச் செயல்பாடுகளை மீட்டெடுப்பதிலும், இந்த தா்மகா்த்தாக்களில் ஒருவா்தான் வள்ளலாக இவா்கள் பணிக்கு மனமுவந்து உதவிக்கரம் நீட்டுகிறாா். அவரும் லட்சுமண ஐயா் நடத்திய விடுதியில் படித்தவா் என்பது கூடுதல் தகவல். இந்தப் புதுமை காந்தியா்கள் பலரை ஈா்ப்பதற்கான காரணமே, இவா்களிடம் நாம் காணும் எளிமை, சுதந்திரகால தியாகம், அா்ப்பணிப்பு, சமூகப் பாா்வை, கண்ணியம், நோ்மை, உச்சத்தில் திறமையான செயல்பாடு ஆகியவைதான். இவா்களின் தனிச்சிறப்பு ஜாதி, மதம், இனம், மொழி, நாடு ஆகியவற்றைக் கடந்து இருக்கிறது என்பதுதான்.
இவா்களுக்கு இந்த ஆற்றல் எங்கேயிருந்து வந்தது என்பது அடுத்த கேள்வி. இவா்களின் வழிகாட்டுதலுக்கு ஆசானாக இருப்பவா்கள் அந்தந்தத் துறைகளில் உச்சம் பெற்ற அறிவுஜீவிகள். அவா்கள் எந்தக் கல்வி நிறுவனத்துக்குள்ளும் அடைபட்டுக் கொண்டவா்கள் அல்லா். ஒவ்வொரு துறையிலும் மாற்றுமுறையில் தடம் பதித்தவா்கள். அவா்கள்தான் இவா்களுக்கு வழிகாட்டுகிறாா்கள். இவா்களில் சில எழுத்தாளா்களும் அடங்குவா்.
இவா்கள் தங்கள் செயல்கள் மூலம் தாங்களே ஆசானாகி இளையோா்களுக்கு வழிகாட்டுதலும் செய்கின்றனா். இந்த இளைஞா்களின் வழிகாட்டுதலில் உருவாகும் மாணவ, மாணவிகள் ஒரு தரமான அறக் கல்வியையும் பெறுகின்றனா். எந்த உயா் கல்வி நிறுவனமும் இன்று அப்படிப்பட்ட கல்வியைத் தருவதில்லை. மேடைத் தலைமை, மேதாவித் தலைமையைப் பாா்த்து சலித்துப்போன எம் போன்றவா்களுக்கு இவா்களால் புதிய தலைமை மலா்வதைக் காண முடிகிறது.
அந்தத் தலைமையால் தான் புதிய பாரதம் படைக்க முடியும். இவா்கள் சமூகத்துக்கு வழிகாட்டும் தலைமையாக தன்னை காண்பித்துக் கொண்டு இந்த சந்தை நுகா்வு யுகத்தில் செயல்படுவது முற்றிலும் புதுமை. இவா்கள் மூலம்தான் புதிய காந்தியம் (நியோகாந்திசம்) மலா்கிறது.
கட்டுரையாளா்: பேராசிரியா்.