சென்னை, அரும்பாக்கத்தில் உள்ள அறிஞர் அண்ணா அரசினர் இந்திய மருத்துவமனையில் காலியாக உள்ள மருந்துசெய் உடனாளர் பணிக்கு விண்ணப்பிப்பதற்கான கால அவகாசம் மே 21 -ஆம் தேதி வரை நீட்டிக்கப்பட்டுள்ளது.

இதுகுறித்து சென்னை மாவட்ட ஆட்சியர் அலுவலகம் வெளியிட்ட செய்திக்குறிப்பில், சென்னை அரும்பாக்கத்தில் உள்ள அறிஞர் அண்ணா அரசினர் இந்திய மருத்துவமனையில் 25 மருந்துசெய் உடனாளர் பணியிடங்கள் காலியாக உள்ளன. இப்பணிக்கு குறைந்தபட்சம் 8 -ஆம் வகுப்பு தேர்ச்சி பெற்றிருக்க வேண்டும். ரூ.16, 600 காலமுறை அடிப்படையில் மாத ஊதியம் வழங்கப்படும்.

இதற்கான விண்ணப்பம், மருத்துவமனை வளாகத்தில் உள்ள கண்காணிப்பாளர் அலுவலகத்தில் ஏப்ரல் 20 -ஆம் தேதி வரை விநியோகிக்கப்படும் என அறிவிக்கப்பட்டிருந்தது. தற்போது, அக்கால அவகாசம் மே 7-ஆம் தேதி வரை நீட்டிக்கப்பட்டுள்ளது. இதேபோல், விண்ணப்பங்கள் வந்து சேருவதற்கான தேதி ஏப்ரல் 27 -இல் இருந்து மே 21 -ஆம் தேதி வரை நீட்டிக்கப்பட்டுள்ளது என்று அதில் தெரிவிக்கப்பட்டுள்ளது.