குஜராத் மாநில சட்டப்பேரவைத் தேர்தல் தேதிகள் அறிவிக்கப்பட்டன. டிசம்பர் 9-ந் தேதி, டிசம்பர் 14-ந் தேதி என இரண்டு கட்டங்களாக தேர்தல் நடைபெறவுள்ளன.

இதையடுத்து வாக்கு எண்ணிக்கை டிசம்பர் 18-ந் தேதி நடைபெறுகிறது. இதனால், பாஜக, காங்கிரஸ் உள்ளிட்ட கட்சிகள் அங்கு தீவிர வாக்கு சேகரிப்பில் ஈடுபட்டு வருகிறது.

பாஜக தரப்பில் குஜராத் முன்னாள் முதல்வரும், இந்தியப் பிரதமருமான நரேந்திர மோடி, பாஜக தேசியத் தலைவர் அமித்ஷா உள்ளிட்டோர் தீவிரமாக வாக்கு சேகரித்து வருகின்றனர்.

காங்கிரஸ் சார்பில் அக்கட்சியின் துணைத் தலைவர் ராகுல் பிரசாரத்தில் ஈடுபட்டு வருகிறார். அவர் குஜராத்தின் பரூச் பகுதியில் புதன்கிழமை மாலை சாலை மார்கமாக தீவிர வாக்கு சேகரிப்பில் ஈடுபட்டு வந்தார்.

அப்போது, கூட்டத்தில் இருந்த சிறுமி திடீரென ராகுல் பிரசார வாகனத்தை நோக்கிப் பாய்ந்தார். பின்னர் வாகனத்தின் மீது ஏறிய அந்தச் சிறுமி, ராகுலுடன் கைகுலுக்கி வாழ்த்து தெரிவித்து செல்ஃபி எடுத்துக்கொண்டார். 

இதன்பின்னர் காங்கிரஸ் துணைத்தலைவர் ராகுல் அந்தச் சிறுமிக்கு வாழ்த்து தெரிவித்தார். இந்த விடியோ பதிவு தற்போது சமூக வலைதளங்களில் வைரலாகப் பரவி வருகிறது.