பாஜகவில் நடிகை மகாஸ்வேதா ராய்

ஒடிஸா மாநிலத்தைச் சேர்ந்த பழம்பெரும் ஒடியா மொழி நடிகை மகாஸ்வேதா ராய், பாஜகவில் திங்கள்கிழமை இணைந்தார்.
புவனேசுவரத்தில் உள்ள பாஜக அலுவலகத்தில் திங்கள்கிழமை நடைபெற்ற நிகழ்ச்சியில், மத்திய அமைச்சர் தர்மேந்திர பிரதான், கட்சியின் மூத்த தலைவர்கள் முன்னிலையில் அவர் அக்கட்சியில் இணைந்தார்.
ஒடியா மொழி நடிகர்களான மிஹிர் தாஸ், அனு சௌதரி ஆகியோர் பாஜகவில் கடந்த மாதம் இணைந்தனர். இதையடுத்து, பாஜகவில் பழம்பெரும் நடிகையான மகாஸ்வேதா ராய் இணைந்துள்ளார்.
ஒடியா மொழி திரையுலகில் மிகவும் புகழ்பெற்று விளங்கும் மகாஸ்வேதா ராய், வங்க மொழி திரைப்படங்களிலும் நடித்துள்ளார்.
55 வயதாகும் மகாஸ்வேதா ராய், கடந்த 1976ஆம் ஆண்டில் சேஷா ஸ்ரபணா எனும் திரைப்படத்தின் மூலம் ஒடியா மொழி திரையுலகில் அறிமுகமானார்.