2019 மக்களவைத் தேர்தல்: பாஜகவுக்கு எதிராக அமைந்தது முதல் கூட்டணி

பெங்களூர்: கர்நாடகாவில் பாஜகவை ஆட்சிக்கு வர விடாமல் இருக்க அமைக்கப்பட்ட காங்கிரஸ் - மதசார்பற்ற ஜனதா தளம் கூட்டணி, தற்போது 2019ல் நடைபெற உள்ள மக்களவைத் தேர்தலுக்கும் தொடர உள்ளது.

மக்களவைத் தேர்தலைப் பொறுத்தவரை பாஜகவுக்கு எதிராக அமைக்கப்பட்ட முதல் கூட்டணியாக காங்கிரஸ் - மஜத கூட்டணி அமைந்துள்ளது.

இதே போல, அந்தந்த மாநிலங்களில் உள்ள மாநிலக் கட்சிகளுடன் கூட்டணி அமைத்து, பாஜகவை பின்னுக்குத் தள்ள காங்கிரஸ் திட்டமிட்டுள்ளது.  அந்த வகையில் ஆந்திராவில் தெலுங்கு தேசம், தமிழகத்தில் திமுக போல டிஆர்எஸ், திரிணாமூல் காங்கிரஸ், தேசியவாத காங்கிரஸ், சமாஜ்வாதி கட்சி, பகுஜன் சமாஜ்வாதி உள்ளிட்ட கட்சிகளுடன் கூட்டணி அமைக்க காங்கிரஸ் முடிவு செய்துள்ளது.

பல மாநிலங்களுக்கு எதிராக பாஜக எடுத்த கொள்கை முடிவுகளால், தற்போது பாஜகவுக்கு எதிரான அலை வீசத் தொடங்கியுள்ளது. குறிப்பாக தென்மாநிலங்களில். அந்த வகையில், வரும் மக்களவைத் தேர்தலில் பாஜகவுக்கு எதிரான கட்சிகளை ஒன்று திரட்டி கூட்டணி அமைத்து வெற்றிக் கனியைப் பறிக்க காங்கிரஸ் தேர்தல் களம் அமைத்து காய் நகர்த்தி வருகிறது.

இதற்காக, மாநில கட்சிகளுக்கு காங்கிரஸ் பகிரங்க அழைப்பையும் விடுத்துள்ளது. 

கர்நாடகாவில், தேவேகௌடவின் அரசியல் பலத்தால் மேலும் சில மாநில கட்சிகளையும், தங்கள் கூட்டணியில் கொண்டு வர முடியும் என்று எதிர்பார்க்கப்படுகிறது. இதனால், மூன்றாவது கட்சி உருவாகும் வாய்ப்புக் குறையும் என்று கூறலாம்.