சிபிஎஸ்இ 10ம் வகுப்பு தேர்வு முடிவு: வழக்கம் போலத்தான் இந்த ஆண்டும்

சிபிஎஸ்இ 10ம் வகுப்பு தேர்வு முடிவுகள் இன்று மதியம் வெளியாகின. இதில் வழக்கம் போலவே இந்த ஆண்டும் மாணவர்களை விட மாணவிகளே அதிக அளவில் தேர்ச்சி பெற்றுள்ளனர்.

தேர்வெழுதிய மாணவ, மாணவிகளில் 86.70 சதவீதம் பேர் தேர்ச்சி அடைந்துள்ளனர். இவர்களில் மாணவர்கள் 85.32 சதவீதம் தேர்ச்சி பெற, மாணவிகளோ 88.67 சதவீதம் தேர்ச்சி அடைந்துள்ளனர். 

இந்த ஆண்டு 4 மாணவர்கள் தேசிய அளவில் முதலிடம் பிடித்துள்ளனர். பிரகார் மிட்டல் - குர்கான், ரிம்ஸிம் அகர்வால் - பிஜ்நோர், நந்தினி - கார்க், ஷாம்லி மற்றும் ஸ்ரீலட்சுமி - கொச்சி ஆகியோர் 500க்கு 499 மதிப்பெண்கள் பெற்றுள்ளனர்.

அவர்களுக்கு அடுத்து 7 மாணவர்கள் 498 மதிப்பெண்களுடன் 2ம் இடத்திலும், 497 மதிப்பெண்களுடன் 14 மாணவர்கள் 3வது இடத்தையும் பிடித்தனர்.

திருவனந்தபுரம் 99.60 சதவீத தேர்ச்சியுடன் முதல் இடத்தையும், சென்னை மண்டலம் 97.37 சதவீத தேர்ச்சியுடன் இரண்டாவது இடத்தையும், அஜ்மீர் 91.86 சதவீதத்துடன் 3வது இடத்தையும் பிடித்துள்ளது.

10ம் வகுப்புப் பொதுத் தேர்வு ரத்து செய்யப்பட்ட பிறகு, மீண்டும் பொதுத் தேர்வு அறிவிக்கப்பட்டு, கடந்த கல்வியாண்டில் 16 லட்சம் மாணவ, மாணவிகள் சிபிஎஸ்இ 10ம் வகுப்பு பொதுத் தேர்வை எழுதியது குறிப்பிடத்தக்கது.