ஆந்திரம், தெலங்கானா உள்ளிட்ட 18 மாநிலங்களில் உள்ள 91 மக்களவைத் தொகுதிகளுக்கு முதல்கட்டமாக வியாழக்கிழமை (ஏப்.11) தேர்தல் நடைபெறுகிறது.

இத்தேர்தலுடன் சேர்த்து ஆந்திரம், சிக்கிம் மாநில சட்டப் பேரவைகளுக்கும், ஒடிஸா சட்டப் பேரவையிலுள்ள சில தொகுதிகளுக்கும் தேர்தல் நடைபெறுகிறது.

ஆந்திரம் (25), அருணாசலப் பிரதேசம் (2), அஸ்ஸாம் (5), பிகார் (4), சத்தீஸ்கர் (1), ஜம்மு-காஷ்மீர் (2), மகாராஷ்டிரம் (7), மணிப்பூர் (1), மேகாலயம் (2), மிúஸாரம் (1), நாகாலாந்து (1), ஒடிஸா (4), சிக்கிம் (1), தெலங்கானா (17), திரிபுரா (1), உத்தரப் பிரதேசம் (8), உத்தரகண்ட் (5), மேற்குவங்கம் (2) ஆகிய 18 மாநிலங்கள், அந்தமான்-நிகோபார் தீவுகள் (1), லட்சத்தீவு (1) ஆகிய 2 யூனியன் பிரதேசங்கள் ஆகியவற்றிலுள்ள 91 மக்களவைத் தொகுதிகளுக்கு வியாழக்கிழமை தேர்தல் நடைபெற்று வருகிறது.

இந்நிலையில், உலகிலேயே மிகப்பெரிய ஜனநாயக நாடான இந்தியாவில் நடைபெறவுள்ள தேர்தலை சிறப்பிக்கும் விதமாக கூகுள் இயங்குதளம் டூடுல் வெளியிட்டு சிறப்பித்துள்ளது. இந்த டூடுலின் மூலம் முதல் தலைமுறை வாக்காளர்கள் உட்பட வாக்குப்பதிவு குறித்த முக்கிய தகவல்களையும் வெளியிட்டுள்ளது.