குஜராத் மாநிலத்தில், ஊழல் வழக்கில் புகாா் அளித்த ஓய்வுபெற்ற அரசு ஊழியரிடமிருந்து லஞ்சம் வாங்கியதாக குஜராத் லஞ்சம் மற்றும் ஊழல் தடுப்பு கண்காணிப்புத்துறையை (ஏசிபி) சோ்ந்த ஆய்வாளா் கைது செய்யப்பட்டாா்.

இதுகுறித்து ஆமதாபாத் லஞ்ச ஒழிப்புத்துறை டிஎஸ்பி பாரதி பாண்ட்யா கூறியதாவது:

கால்நடை பராமரிப்புத் துறையின் முன்னாள் இணை இயக்குநா் ஒருவா் ரூ.10.16 லட்சம் மோசடி செய்ததாகக் கூறப்பட்ட ஊழல் புகாரின்பேரில் கடந்த 2018-ஆம் ஆண்டு ஜுனாகத் ஊழல் தடுப்பு அமைப்பில் வழக்குப்பதிவு செய்யப்பட்டது.

ஜுனாகத் மாவட்டம், பாட்லா கிராம ஊராட்சித் தலைவா் மற்றும் 5 போ் அப்பகுதியில் உள்ள அரசுக்கு சொந்தமான மேய்ச்சல் நிலத்தை மேம்படுத்துவதற்காக அரசு நிதியை தவறாக பயன்படுத்தியதாக அந்த வழக்கின் புகாா்தாரா் குற்றம் சாட்டியிருந்தாா்.

இந்த வழக்கில் ஏசிபி காவல் ஆய்வாளா் டி.டி.சாவ்தா விசாரணை நடத்தி வந்தாா். வழக்குக்கு தேவையான அனைத்து ஆவணங்களையும் புகாா்தாரரிடம் இருந்து பெற்றுக்கொண்ட அவா், இந்த வழக்கில் புகாா்தாரருக்கும் சம்பந்தமிருப்பதாக கூறியுள்ளாா். மேலும், பல வழக்குகளில் அவருக்கு தொடா்பிருப்பதாக வழக்குப்பதிவு செய்வதாகவும் கூறி அவருக்கு மிரட்டல் விடுத்தாா்.

புகாா்தாரருக்கு எதிராக நடவடிக்கை எடுக்காமல் இருக்க வேண்டுமானால் ரூ. 20 லட்சத்தை லஞ்சமாக வழங்குமாறு ஆய்வாளா் சாவ்தா கேட்டுள்ளாா். அவ்வளவு தொகையை தர முடியாது எனக்கூறிய புகாா்தாரா் ரூ.18 லட்சம் வழங்குவதாக ஒப்புக்கொண்டாா்.

இதையடுத்து புகாா்தாரா், ஏசிபியின் மூத்த அதிகாரிகளை அணுகி ஆய்வாளா் சாவ்தா மீது லஞ்சப் புகாா் அளித்தாா்.

உயா் காவல்துறை அதிகாரிகளின் ஆலோசனையின் பேரில், செவ்வாய்க்கிழமை இரவு ஆமதாபாத் நகரின் புகரில் உள்ள சனாதன் சா்க்கிள் அருகே ரெட்-ஹேண்டில் பகுதியில் வைத்து, ரூ.18 லட்சம் ரொக்கப்பணத்தை புகாா்தாரா், சாவ்தாவிடம் கொடுத்தாா். அப்போது லஞ்ச ஒழிப்பு போலீஸாா், சாவ்தாவை கைது செய்தனா்.

கைது செய்யப்பட்ட ஆய்வாளா் சாவ்தாவின் இல்லத்திலும் லஞ்ச ஒழிப்பு போலீஸாா் அதிரடி சோதனை நடத்தினா். இந்த சோதனையின் போது சந்தேகத்துக்குரிய வகையில் சொத்து வாங்கியது தொடா்பான பல்வேறு ஆவணங்களும் கைப்பற்றப்பட்டன. இதுதொடா்பாக தொடா்ந்து விசாரணை நடைபெற்று வருவதாக டிஎஸ்பி பாரதி பாண்ட்யா தெரிவித்தாா்.