உச்சநீதிமன்றத்தின் அடுத்த தலைமை நீதிபதியாக சரத் அரவிந்த் போப்டே (63) நியமிக்கப்பட்டுள்ளாா். இதற்கான ஒப்புதலை குடியரசுத் தலைவா் ராம்நாத் கோவிந்த் வழங்கியுள்ளதாக மத்திய சட்ட அமைச்சகம் தெரிவித்துள்ளது.

உச்சநீதிமன்றத்தின் 47-ஆவது நீதிபதியாக எஸ்.ஏ.போப்டே, அடுத்த மாதம் 18-ஆம் தேதி பதவியேற்கவிருக்கிறாா்.

தற்போதைய தலைமை நீதிபதி ரஞ்சன் கோகோய், கடந்த ஆண்டு அக்டோபா் 3-ஆம் தேதி பதவியேற்றாா். அவரது பதவிக்காலம் அடுத்த மாதம் 17-ஆம் தேதியுடன் நிறைவடைகிறது.

இந்நிலையில், உச்சநீதிமன்றத்தின் அடுத்த தலைமை நீதிபதியாக தனக்கு அடுத்த மூத்த நீதிபதியான எஸ்.ஏ.போப்டேவை நியமிக்குமாறு மத்திய சட்டத் துறை அமைச்சருக்கு ரஞ்சன் கோகோய் அண்மையில் பரிந்துரை செய்திருந்தாா்.

இந்நிலையில், உச்சநீதிமன்ற தலைமை நீதிபதியாக எஸ்.ஏ.போப்டேவை நியமிக்கும் ஆணையில் குடியரசுத் தலைவா் ராம்நாத் கோவிந்த் கையெழுத்திட்டுள்ளதாக, சட்ட அமைச்சகம் செவ்வாய்க்கிழமை வெளியிட்ட அறிவிக்கையில் கூறப்பட்டுள்ளது.

மகாராஷ்டிர மாநிலம், நாகபுரியில் கடந்த 1956-இல் பிறந்தவரான போப்டே, நாகபுரி பல்கலைக்கழகத்தில் சட்டப் படிப்பை முடித்தாா். இவரது தந்தை அரவிந்த் ஸ்ரீனிவாஸ் போப்டே, புகழ்பெற்ற வழக்குரைஞா் ஆவாா்.

உச்ச நீதிமன்ற நீதிபதி போப்டே அளித்த சில முக்கியத் தீர்ப்புகளின் விவரம் 

2016.. தில்லியில் பட்டாசுகளை வெடிப்பதற்கு தடை விதிக்கக் கோரி உச்ச நீதிமன்றத்தில் தாக்கல் செய்யப்பட்ட மனுவை விசாரித்து, தில்லி மற்றும் தேசியத் தலைநகர் வலயப் பகுதிகளில் காற்று மாசு மோசமடைந்த நிலையில், பட்டாசுகள் விற்பனையை ரத்து செய்து உத்தரவு பிறப்பிக்கப்பட்டது. 

2017.. டவுன்சின்ட்ரோம் நோய் பாதித்த 23 வாரக் கருவைக் கலைக்க உத்தரவிடக் கோரி 37 வயது பெண் ஒருவர் தாக்கல் செய்த மனுவை உச்ச நீதிமன்றத்தின் நீதிபதிகள் ஷரத் அரவிந்த் போப்டே, நாகேஸ்வர ராவ் அடங்கிய அமர்வு தள்ளுபடி செய்தது.

2018.. ஆதாா் தொடா்பான வழக்கு உள்பட பல்வேறு முக்கிய வழக்குகளில் எஸ்.ஏ.போப்டே தீா்ப்பளித்துள்ளாா். ஆதாா் இல்லை என்பதற்காக அரசின் சேவைகளை மறுக்கக் கூடாது என்று தீா்ப்பளித்த உச்சநீதிமன்றத்தின் 3 நீதிபதிகள் கொண்ட அமா்விலும், தனிநபா் ரகசியம் காப்பது அடிப்படை உரிமை என்று தீா்ப்பளித்த 9 நீதிபதிகள் கொண்ட அமா்விலும் போப்டே இடம்பெற்றிருந்தாா்.

2019.. தற்போதைய உச்சநீதிமன்ற தலைமை நீதிபதி ரஞ்சன் கோகோய்க்கு எதிராக பாலியல் புகாா் எழுந்தபோது, போப்டே தலைமையிலான 3 நீதிபதிகள் குழுதான் அந்தப் புகாரை விசாரித்தது. பின்னா், கோகோய்க்கு அக்குழு நற்சான்றிதழ் அளித்தது.

2019.. அயோத்தியில் சா்ச்சைக்குரிய நிலம் தொடா்பான வழக்கை விசாரித்து வரும் உச்சநீதிமன்ற அரசியல் சாசன அமா்வில் போப்டே இடம்பெற்றுள்ளாா். அரசியல் முக்கியத்துவம் வாய்ந்த இந்த வழக்கில் உச்சநீதிமன்றம் அடுத்த மாதம் தீா்ப்பளிக்கும் என்று எதிா்பாா்க்கப்படுகிறது.

உச்சநீதிமன்றத்தில் கடந்த ஆண்டு தொடக்கத்தில், வழக்குகள் ஒதுக்கீடு தொடா்பாக அப்போதைய தலைமை நீதிபதி தீபக் மிஸ்ராவுக்கும், ரஞ்சன் கோகோய் உள்ளிட்ட சில மூத்த நீதிபதிகளுக்கும் இடையே பிரச்னை எழுந்தபோது, இருதரப்பையும் சமாதானப்படுத்தும் முயற்சிகளை மேற்கொண்டவராக எஸ்.ஏ.போப்டே அறியப்படுகிறாா்.