அனைத்து ரயில் சேவைகளும் ஆகஸ்ட் மாதம் 12-ஆம் தேதி வரை ரத்து செய்யப்படுவதாக ரயில்வே வாரியம் வியாழக்கிழமை அறிவித்தது.

இதுதொடா்பாக அந்த வாரியம் வெளியிட்ட உத்தரவில் கூறப்பட்டதாவது:

நாடு முழுவதும் கரோனா நோய்த்தொற்று பாதிக்கப்படுவோரின் எண்ணிக்கை தொடா்ந்து அதிகரித்து வருகிறது. இதை கருத்தில் கொண்டு, விரைவு ரயில்கள், புகா் ரயில்கள் உள்ளிட்ட அனைத்து வகையான பயணிகள் ரயில் சேவைகள் ஆகஸ்ட் மாதம் 12-ஆம் தேதி வரை ரத்து செய்யப்படுகின்றன. இதையொட்டி ஜூலை 1-ஆம் தேதி முதல் ஆகஸ்ட் மாதம் 12-ஆம் தேதி வரை முன்பதிவு செய்யப்பட்ட அனைத்து பயணச்சீட்டுகளும் ரத்து செய்யப்படுகின்றன. பயண கட்டணம் முழுவதும் திரும்ப அளிக்கப்படும். எனினும் ராஜ்தானி ரயில்கள் செல்லும் வழித்தடத்தில் மே 12-ஆம் தேதி முதல் 12 நகரங்களுக்கு இயக்கப்பட்டு வரும் ரயில்கள், ஜூன் 1-ஆம் தேதி முதல் 100 நகரங்களுக்கு தினசரி இயக்கப்பட்டு வரும் ரயில்கள் தொடா்ந்து இயக்கப்படும் என்று தெரிவிக்கப்பட்டது.