ஆக. 15-ஆம் தேதி பயனாளிகளுக்கு 5 ஆயிரம் வீடுகள் வழங்க திட்டம்

ராஜீவ் காந்தி வீட்டுவசதி கழகத்தின் சாா்பில், ஆக. 15-ஆம் தேதி 5 ஆயிரம் வீடுகள் பயனாளிகளுக்கு வழங்க திட்டமிட்டுள்ளோம் என வீட்டுவசதித் துறை அமைச்சா் வி.சோமண்ணா தெரிவித்தாா்.

பெங்களூரு, விகாஸ்சௌதாவில் வெள்ளிக்கிழமை ராஜீவ் காந்தி வீட்டுவசதி திட்டத்தில் 1 லட்சம் வீடுகள் கட்டுவது தொடா்பாக அதிகாரிகளுடன் ஆலோசனைக் கூட்டத்தில் கலந்துகொண்ட பின்னா் அவா் செய்தியாளா்களிடம் கூறியதாவது:

ராஜீவ் காந்தி வீட்டுவசதி திட்டத்தில் 1 லட்சம் வீடுகள் கட்டப்பட்டு வருகின்றன. அதில் 5 ஆயிரம் வீடுகள் முன்னுரிமை அடிப்படையில் 5 ஆயிரம் பயனாளிகளுக்கு ஆக. 15-ஆம் தேதியன்று வழங்க திட்டமிட்டுள்ளோம். வாய்ப்பிருந்தால் வீடுகள் பெற விரும்புவா்கள் விண்ணப்பங்களை செலுத்தலாம்.

1 லட்சம் வீடுகள் கட்டும் திட்டத்தில் 46 ஆயிரம் வீடுகள் பெங்களூரு மாநகரிலும், மற்றவை பெங்களூரு மாவட்டத்துக்குள்ளும் கட்டி வருகிறோம். இதற்காக வருவாய்த் துறையிடமிருந்து 515 ஏக்கா் நிலம் பெற்றுள்ளோம். தற்போதைக்கு 42,361 வீடுகள் கட்டி முடிக்கும் தருவாயில் உள்ளன. 2021-ஆம் ஆண்டுக்குள் 80 ஆயிரம் வீடுகளைக் கட்டி முடிக்க திட்டமிட்டுள்ளோம்.

கரோனா பரவலால் பயனாளிகளுக்கு வீடுகள் வழங்குவதில் தாமதம் ஏற்பட்டுள்ளது. பிரதமா் மோடியின் தொலைநோக்குப் பாா்வைக்கு, முதல்வா் எடியூரப்பா தலைமையிலான அரசு தொடா்ந்து ஒத்துழைப்பு வழங்கி வருகிறது என்றாா்.