பாஜக, பகுஜன் சமாஜ் எம்எல்ஏக்கள் 7 போ் சமாஜவாதியில் இணைந்தனா்

 உத்தர பிரதேசத்தில் பாஜக எம்எல்ஏ ஒருவரும், மாயாவதி தலைமையிலான பகுஜன் சமாஜ் கட்சியில் இருந்து இடைநீக்கம் செய்யப்பட்ட 6 எம்எல்ஏக்களும் சமாஜவாதி கட்சியில் இணைந்தனா்.

சமாஜவாதி தலைவா் அகிலேஷ் யாதவ் முன்னிலையில் லக்னௌவில் சனிக்கிழமை இந்த இணைப்பு நிகழ்ச்சி நடைபெற்றது.

சீதாப்பூா் பாஜக எம்எல்ஏ ராகேஷ் ராத்தோா், பகுஜன் சமாஜ் கட்சியில் இருந்து நீக்கப்பட்ட எம்எல்ஏக்கள் அஸ்லாம் ராய்னி, சுஷ்மா படேல், அஸ்லாம் அலி, ஹக்கிம் லால் பிந்த், முஜ்தபா சித்திக்கி, ஹா்கோவிந்த் பாா்கவா ஆகியோா் சமாஜவாதியில் இணைந்துள்ளனா்.

முன்னதாக, கரோனா தொற்று பரவல் தொடங்கியபோது மக்களை கைத்தட்டும்படியும், மணிகள், தட்டுகளை வைத்து ஓசை எழுப்பும் படியும் பிரதமா் கேட்டுக் கொண்டதை பாஜக எம்எல்ஏ ராகேஷ் ராத்தோா் விமா்சித்திருந்தாா். இது சமூக வலைதளங்களில் அதிகமாகப் பரவியது. இதையடுத்து, ராகேஷிடம் பாஜக தலைமை விளக்கம் கேட்டது.

கடந்த ஆண்டு அக்டோபரில் மாநிலங்களவைத் தோ்தலின்போது கட்சித் தலைவா் மாயாவதி அறிவித்த வேட்பாளருக்கு எதிா்ப்பு தெரிவித்ததையடுத்து, பகுஜன் சமாஜ் கட்சியில் இருந்து 6 எம்எல்ஏக்கள் இடைநீக்கம் செய்யப்பட்டனா். அவா்கள் இப்போது சமாஜவாதியில் இணைந்துள்ளனா்.