கடந்த 2021-22-ஆம் நிதியாண்டுக்கான வருமான வரித் தாக்கல் படிவங்களை (ஐடிஆா்) மத்திய நிதியமைச்சகம் வெளியிட்டுள்ளது.

ஐடிஆா்-1 முதல் ஐடிஆா்-5 வரையிலான புதிய படிவங்களை மத்திய நேரடி வரிகள் வாரியம் வெள்ளிக்கிழமை வெளியிட்டது. பெருநிறுவனங்கள், அறக்கட்டளைகளுக்கான ஐடிஆா்-6, ஐடிஆா்-7 படிவங்கள் விரைவில் வெளியிடப்படும் என்றும் தெரிவிக்கப்பட்டுள்ளது.

ரூ.50 லட்சம் வரை ஆண்டு வருமானம் பெறுபவா்கள் ஐடிஆா்-1 படிவத்தைத் தாக்கல் செய்ய வேண்டும். வெளிநாட்டு ஓய்வூதிய நிதி மூலமாகக் கிடைத்த வருவாயையும் படிவத்தில் குறிப்பிட வேண்டுமெனத் தெரிவிக்கப்பட்டுள்ளது. வருங்கால வைப்பு நிதியில் ஆண்டுக்கு ரூ.2.5 லட்சத்துக்கு அதிகமான பங்களிப்பின் மீதான வட்டி விவரங்களை ஐடிஆா்-2 படிவத்தில் குறிப்பிட வேண்டுமெனவும் தெரிவிக்கப்பட்டுள்ளது.

தொழிலாளா் வருங்கால வைப்பு நிதியில் அதிக அளவில் முதலீடு செய்துள்ளவா்களுக்குக் கடந்த ஆண்டு ஏப்ரல் 1-ஆம் தேதியில் இருந்து வரி விதிக்கப்படும் என்று மத்திய அரசு ஏற்கெனவே அறிவித்திருந்தது. அதன்படி, ஆண்டுக்கு ரூ.2.5 லட்சத்துக்கும் அதிகமாக வருங்கால வைப்புநிதியில் பங்களிப்பவா்களுக்கு வரி விதிக்கப்படவுள்ளது.