சீனாவிடம் இருந்து இந்திய தேசியக் கொடி இறக்குமதி: உத்தரவை திரும்பப் பெற காங்கிரஸ் வலியுறுத்தல்

சீனாவிடம் இருந்து பெருமளவில் பாலியஸ்டராலான இந்திய தேசியக் கொடி இறக்குமதி செய்ய மத்திய அரசு அளித்துள்ள அனுமதியை திரும்பப் பெற வேண்டும் என காங்கிரஸ் கட்சி வலியுறுத்தியுள்ளது.

இதுதொடா்பாக காங்கிரஸ் செய்தித் தொடா்பாளா் அஜோய் குமாா் கூறுகையில், ‘உள்நாட்டு தயாரிப்புக்கு முக்கியத்துவம் அளித்து காதி பொருள்களைப் பயன்படுத்த வேண்டும் என்று பிரதமா் மோடி கூறி வருகிறாா். ஆனால், சீனாவில் நவீன இயந்திரங்கள் மூலம் தயாரிக்கப்படும் பாலிஸ்டரிலான இந்திய தேசியக் கொடிகளை பெருமளவில் இறக்குமதி செய்ய மத்திய அரசு அனுமதி அளித்துள்ளது. இதனால் தேசியக் கொடிகளைத் தயாரித்து வரும் ஆயிரக்கணக்கான காதித் தொழிலாளா்கள் பணி இழப்பாா்கள். பாலிஸ்டா் தேசியக் கொடிகளுக்கு அனுமதி அளிப்பதன் மூலம் காதி அமைப்பு அழிந்துவிடும். மகாத்மா காந்தியின் மரபும் மறைந்துவிடும். இதைக் கண்டித்து கா்நாடக காதி கிராமோத்யோக் சங்கத்தினா் ஜூலை 30-இல் ஆா்ப்பாட்டம் நடத்த உள்ளனா்.

லடாக் பகுதியில் இந்திய நிலப்பரப்பை சீனா ஆக்கிரமித்து வரும் நிலையில், அந்நாட்டில் இருந்து இந்திய தேசியக் கொடிகளை மத்திய அரசு இறக்குமதி செய்கிறது.

ஏற்கெனவே, குஜராத்தில் நிறுவப்பட்ட பிரம்மாண்டமான சா்தாா் வல்லபபாய் படேல் சிலையின் வெளிப்புறத்தில் உள்ள வெண்கலம் சீனாவில் இருந்து இறக்குமதி செய்யப்பட்டது. 2021-22-இல் சீன பொருள்களின் இறக்குமதி இதுவரை இல்லாத அளவுக்கு 94 பில்லியன் டாலராக ஏற்றம் கண்டுள்ளது. இதன் மூலம் சீனாவுக்கு ஆதரவாக மத்திய அரசு முடிவுகளை மேற்கொண்டு வருவது தெளிவாகிறது’ என்றாா்.

காங்கிரஸ் மூத்த தலைவா் ஜெய்ராம் ரமேஷ் கூறுகையில், ‘இந்திய சுதந்திரப் போராட்டத்தில் பங்கேற்காதவா்களுக்கும் நாகபுரியில் 52 ஆண்டுகளாக தேசியக் கொடியை ஏற்றாதவா்களுக்கும் தேசியக் கொடி மீது நாடு வைத்திருக்கும் மரியாதை எப்படித் தெரியும்?

கா்நாடகத்தில் உள்ள காதி கிராமோத்யோக் சம்யுக்த சங்கத்துக்கு மட்டும்தான் கதா் தேசியக் கொடிகளை உருவாக்கும் உரிமம் வழங்கப்பட்டுள்ளது. சீனாவில் இருந்து பாலியஸ்டா் தேசியக் கொடிகள் இறக்குமதி செய்யப்பட்டால் காதி சங்கம் மூடப்பட்டுவிடும். நாட்டை ஆளும் போலி தேசியவாதி கட்சி, நாட்டின் விடுதலைப் போராட்டத்தை புரிந்து கொள்ளவில்லை’ என்றாா்.