பிரபல நடிகரும் அரசியல்வாதியுமான நடிகர் தேவன் கேரள மாநில பாரதிய ஜனதா கட்சியின் துணைத் தலைவராகத் தேர்ந்தெடுக்கப்பட்டுள்ளார்.

மலையாளத்தில் அறிமுகமான தேவன், தென்னிந்திய மொழிகளிலேயே 400க்கும் மேற்பட்ட படங்களில் நடித்திருக்கிறார். தமிழில் பிரதாப் படத்தில் அறிமுகமான இவர் ஜெய்ஹிந்த், பாட்ஷா, உல்லாசம், நெஞ்சினிலே, சிட்டிசன், ஏகன், இமைக்கா நொடிகள் உள்ளிட்ட பல படங்களில் நடித்துள்ளார்.

கடந்த 2004 ஆம் ஆண்டு கேரள மக்கள் இயக்கம் என்கிற கட்சியைத் துவங்கி தேர்தல்களில் போட்டியிட்டு வந்தார். பின், 2021 முதல் தன் கட்சியை கேரள மாநில பாஜகவுடன் இணைத்துக் கொண்டு செயல்பட்டு வருகிறார். 

இதையும் படிக்க: மக்களவைக்குள் அத்துமீறல்: மூளையாக இருந்து செயல்பட்டது யார்?

இந்நிலையில், கேரள மாநில பாஜக தலைவர் சுரேந்திரன், கட்சியின் மாநில துணைத் தலைவராக தேவன் தேர்ந்தெடுக்கப்பட்டுள்ளதாக அறிவித்திருக்கிறார்.

இருமுறை சட்டபேரவைத் தேர்தல்களில் போட்டியிட்ட தேவன், இதுவரை எந்தத் தொகுதியிலும் வெல்லவில்லை என்பது குறிப்பிடத்தக்கது.