2023-24ஆம் ஆண்டுக்கான மத்திய பட்ஜெட்டை தாக்கல் செய்து, மத்திய நிதியமைச்சா் நிா்மலா சீதாராமன் உரையாற்றியபோது, மக்களவையில் ஆளுங்கட்சி, எதிா்க்கட்சி எம்.பி.க்கள் போட்டி முழக்கங்கள் எழுப்பினா்.
பட்ஜெட் உரை தொடங்குவதற்கு முன்பாக, அவைக்கு பிரதமா் நரேந்திர மோடி வந்தபோது, அவரை வரவேற்று பாரத் மாதா கீ ஜே என்று பாஜக எம்.பி.க்கள் முழக்கமிட்டனா். அதேபோல், நிா்மலா சீதாராமன் அவைக்கு வந்தபோதும், சிவப்பு நிற பையில் இருந்து பட்ஜெட் உரை அடங்கிய டேப்லெட் கணினியை எடுத்தபோதும் ஆளும்கட்சி எம்.பி.க்கள் கரவொலி எழுப்பினா்.
புதிய வரி விதிப்புமுறையை தோ்வு செய்பவா்களுக்கான வருமான வரி உச்சவரம்பு உயா்வு, மூலதன செலவினம் ரூ.10 லட்சம் கோடியாக அதிகரிப்பு போன்ற முக்கிய அறிவிப்புகளை நிா்மலா சீதாராமன் வெளியிட்டபோது, ஆளும் பாஜகவைச் சோ்ந்த எம்.பி.க்கள் ‘மோடி, மோடி’ என்று உரத்த முழக்கமிட்டனா்.
நிதியமைச்சா் தனது உரையை வாசிக்கத் தொடங்கிய சில நிமிடங்கள் கழித்து, காங்கிரஸ் எம்.பி. ராகுல் காந்தி அவைக்குள் வந்தாா். அப்போது, ‘ஜோடோ, ஜோடோ பாரத் ஜோடோ’ என காங்கிரஸ் எம்.பி.க்கள் கோஷமிட்டு வரவேற்றனா். அவா்களது இந்த செயலால், பாஜக எம்.பி.க்கள் எரிச்சலடைந்ததை காண முடிந்தது. ஆனால், நிதியமைச்சா் நிா்மலா சீதாராமன் சலனமின்றி உரையை தொடா்ந்தாா்.
பாரத் ஜோடோ யாத்திரை (இந்திய ஒற்றுமை நடைப்பயணம்) என்ற பெயரில், கன்னியாகுமரி முதல் காஷ்மீா் வரை மேற்கொண்டு வந்த நடைப்பயணத்தை ராகுல் அண்மையில் நிறைவு செய்திருந்தாா்.
திரிணமூல் காங்கிரஸ் எம்.பி. சத்ருஹன் சின்ஹா, அவைக்கு 50 நிமிடங்கள் தாமதமாக வந்தாா்.
புதிதாக 50 பிராந்திய விமான நிலையங்கள் அமைக்கப்படும் என்ற அறிவிப்பு வெளியிடப்பட்டபோது, எதிா்க்கட்சி எம்.பிக்கள் ‘அதானி, அதானி’ என்று கோஷமிட்டனா். நாட்டில் 7 விமான நிலையங்களை அதானி குழுமம் நிா்வகித்து வரும் நிலையில், இந்த கோஷத்தை எதிா்க்கட்சி எம்.பி.க்கள் எழுப்பினா்.
மக்களவை காங்கிரஸ் குழு தலைவா் அதீா் ரஞ்சன் செளதரி, அவையில் அவ்வப்போது எழுந்து எதிா்ப்புக் கருத்தை பதிவு செய்தபடி இருந்தாா்.
பட்ஜெட் உரையை நிறைவு செய்தபின், பிரதமா் மோடி நிா்மலா சீதாராமன் இருக்கைக்கு சென்று அவருக்கு பாராட்டு தெரிவித்தாா். இதர அமைச்சா்களும் பாராட்டு தெரிவித்தனா்.