புது தில்லி: ஹிண்டன்பர்க் நிறுவனத்தின் மோசடி குற்றச்சாட்டைத் தொடர்ந்து அதானி குழும பங்குகள் சரிவால் பங்குச் சந்தையில் ஏற்பட்ட பாதிப்பு குறித்து செபி பதிலளிக்க உச்ச நீதிமன்றம் உத்தரவிட்டுள்ளது.

ஹிண்டன்பா்க் நிறுவனத்தின் மோசடி குற்றச்சாட்டைத் தொடா்ந்து அதானி குழும பங்குகள் பெரும் சரிவைக் கண்டன. அக்குழும நிறுவனங்களில் முதலீடுகளை மேற்கொண்டிருந்த எல்ஐசி, எஸ்பிஐ ஆகியவற்றின் பங்குகளும் சரிவடைந்தன. இந்த விவகாரத்தில் காங்கிரஸ் உள்ளிட்ட எதிா்க்கட்சிகள் இணைந்து மத்திய அரசுக்கு அழுத்தம் அளித்து வருகின்றன.

இதையும் படிக்க.. எப்போதெல்லாம் கருணாநிதியின் பேனா குனிந்ததோ.. முதல்வர் ஸ்டாலினின் சூசகப் பேச்சு

இந்த நிலையில், பங்குச் சந்தை வீழ்ச்சியடைவதைக் கட்டுப்படுத்துவதிலிருந்து செபி செயலற்று விட்டதாக உச்ச நீதிமன்றத்தில் பொது நலன் மனு தாக்கல் செய்யப்பட்டது.

மனுவை விசாரித்த உச்ச நீதிமன்றம், அதானி குழும விவகாரத்தில், தற்போதுள்ள ஒழுங்குமுறை கட்டமைப்புகள் பற்றி மத்திய நிதியமைச்சகம் மற்றும் செபி ஆகியவை பதிலளிக்குமாறு உத்தரவிட்டுள்ளது.

இந்திய முதலீட்டாளர்கள் பாதுகாக்கப்படுவதை உறுதி செய்வதற்கான வழிமுறைகள் இருக்க வேண்டும் என்றும் உச்ச நீதிமன்றம் அறிவுறுத்தியிருக்கிறது.

ஹிண்டர்பெர் அறிக்கையால் அதானி குழும பங்குகள் வீழ்ச்சியை சந்தித்ததால், பங்குச் சந்தையில் கடும் ஏற்றத்தாழ்வு ஏற்பட்டது.

பங்குச் சந்தையின் செயல்பாடுகளை கண்காணிக்கும் அமைப்பாக இந்திய பங்கு பரிவா்த்தனை வாரியம் (செபி) செயல்பட்டு வருகிறது. 

பங்குச் சந்தையில் எந்த அளவுக்கு வீழ்ச்சி ஏற்பட்டது என்பதை நீங்கள் நீதிமன்றத்துக்குச் சொல்ல வேண்டிய அவசியமில்லை, இதையெல்லாம் எங்கே சரி செய்ய முடியும் என்பதை சொல்லுங்கள் என்று உச்ச நீதிமன்றம் தெரிவித்துள்ளது.

பங்குச் சந்தை என்பது வெறும் பணக்காரர்கள் மட்டும் முதலீடு செய்யும் இடமல்ல.. மாறிவரும் வரி விகிதங்களால் ஏராளமான மாத வருவாய் ஈட்டுவோரும் முதலீடு செய்யும் இடமாக உள்ளது. இது தொடர்பாக நீங்கள் நிதியமைச்சகம் மற்றும் நிதித்துறை நிபுணர்களிடமும் பேசலாம் என்று நீதிபதிகள் குறிப்பிட்டுள்ளனர்.