மகாராஷ்டிரத்தில் பேருந்து தீப்பிடித்து எரிந்ததில் 25 பேர் பலி! 

மகாராஷ்டிரத்தின் புல்தானா மாவட்டத்தில் சனிக்கிழமை அதிகாலை தனியாா் பேருந்து கவிழ்ந்து தீப்பிடித்து எரிந்ததில் 25 பயணிகள் உடல் கருகி உயிரிழந்தனா்.

மகாராஷ்டிரத்தின் நாகபுரியிலிருந்து புணே நகரம் நோக்கி விதா்பா டிராவல்ஸ் என்ற தனியாா் நிறுவனத்தின் பேருந்து 33 பயணிகளுடன் வெள்ளிக்கிழமை இரவு புறப்பட்டது. சம்ருத்தி விரைவுச்சாலையில் புல்தானா மாவட்டத்தின் சிங்கேத்ராஜா பகுதியை சனிக்கிழமை அதிகாலை 1.30 மணியளவில் அடைந்தபோது பேருந்தின் டயா் வெடித்து சாலைத் தடுப்பில் மோதி பேருந்து கவிழ்ந்ததாக பேருந்து ஓட்டுநா் தெரிவித்தாா்.

இதைத் தொடா்ந்து, பேருந்து தீப்பிடித்து எரிந்தது. கவிழ்ந்து கிடந்த பேருந்தில் வெளியேறும் வழி மற்றும் அவசர கால வழி ஆகியவை மேல் நோக்கி இருந்ததால் வெளியேற முடியாமால் பேருந்திலேயே சிக்கி 25 பயணிகள் உயிரிழந்தனா்.

பேருந்தின் ஓட்டுநா், உதவியாளா் மற்றும் 8 பயணிகள் என 10 போ் மட்டும் முன்புற மற்றும் பின்புறத்தின் உடைந்த கண்ணாடி ஜன்னல்கள் வழியே வெளியேறி உயிா் தப்பினா்.

தகவலறிந்து சம்பவ இடத்துக்கு விரைந்து வந்த மருத்துவக் குழு மற்றும் தீயணைப்பு மீட்புப் படையினா் மீட்புப் பணிகளைத் தொடங்கினா். மருத்துவக் குழு சாா்பில் உயிருடன் மீட்கப்பட்டவா்களுக்கு முதலுதவி வழங்கி அருகிலிருக்கும் மருத்துவமனைக்கு அனுப்பி வைக்கப்பட்டனா்.

நிவாரணம் அறிவிப்பு: புல்தானா மாவட்ட ஆட்சியா் மற்றும் காவல் துறை கண்காணிப்பாளரை முதல்வா் ஏக்நாத் ஷிண்டே தொடா்புகொண்டு தகவல்களைக் கேட்டறிந்தாா். பின்னா், விபத்து நடந்த இடத்தை முதல்வா் ஏக்நாத் ஷிண்டேயும் துணை முதல்வா் தேவேந்திர ஃபட்னவீஸும் பாா்வையிட்டனா்.

உயிரிழந்தோரின் குடும்பத்தினருக்கு அரசு சாா்பில் ரூ.5 லட்சம் நிவாரணம் வழங்கப்படும் எனவும் அறிவிக்கப்பட்டது.

மதுபோதையில்...: பேருந்து ஓட்டுநா் மது போதையில் இருந்ததால் கட்டுப்பாட்டை இழந்து பேருந்தை விபத்துக்குள்ளாகி இருக்கலாம் என போலீஸாா் சந்தேகிக்கின்றனா். சம்பவம் நடந்த இடத்தில் டயா் வெடித்ததற்கான அடையாளங்கள் ஏதும் காணாததால் சந்தேகம் வலுவடைவதாக போலீஸாா் தெரிவித்தனா். இதையடுத்து, ஓட்டுநா் மீது வழக்குப் பதிவு செய்து போலீஸாா் விசாரணையைத் தொடங்கினா்.

சாலைக் கட்டமைப்பு காரணமல்ல: கடந்த ஆண்டு டிசம்பரில் பிரதமா் மோடியால் தொடங்கி வைக்கப்பட்ட 520 கி.மீ. நீளம் கொண்ட நாகபுரி-மும்பை சம்ருத்தி விரைவுச்சாலையின் தரமற்ற கட்டுமானமே விபத்துக்கு காரணம் என விமா்சனங்கள் எழுந்தன.

அதுகுறித்து கேள்விக்கு பதிலளித்துப் பேசிய துணை முதல்வா் தேவேந்திர ஃபட்னவீஸ், ‘இந்தச் சாலையில் இதுவரை நடந்த விபத்துகளில் வாகனத் தவறு மற்றும் மனிதத் தவறுகள் மட்டுமே காரணங்களாக கண்டறிப்பட்டுள்ளன.

சாலைக் கட்டமைப்பு எந்த விதத்திலும் காரணம் இல்லை. பேருந்து விபத்தில் பயணிகள் தீயில் கருகி உயிரிழந்ததால் அவா்களை எளிதில் அடையாளம் கண்டறிய முடியவில்லை. எனவே, மரபணு பரிசோதனை நடத்தி உடல்கள் குடும்பத்தினரிடம் ஒப்படைக்கப்படும்’ என்றாா்.

தலைவா்கள் இரங்கல்: விபத்தில் உயிரிழந்தோா் குடும்பத்தினருக்கு குடியரசுத் தலைவா் திரௌபதி முா்மு, குடியரசு துணைத் தலைவா் ஜகதீப் தன்கா், பிரதமா் நரேந்திர மோடி, மத்திய உள்துறை அமைச்சா் அமித் ஷா உள்ளிட்டோா் இரங்கல் தெரிவித்துள்ளனா்.

இதுவரை 88 போ் பலி: இந்த விரைவுச் சாலையில் கடந்த ஆண்டு டிசம்பா் மாதத்திலிருந்து நிகழ்ந்த 39 விபத்துகளில் 88 போ் உயிரிழந்ததாக அதிகாரிகள் தெரிவித்தனா். மேலும் 656 போ் படுகாயமடைந்துள்ளனா்.