பாஜக தலைமையிலான தேசிய ஜனநாயக கூட்டணியில் லோக் ஜனசக்தி (ராம் விலாஸ்) கட்சித் தலைவா் சிராக் பாஸ்வான் விரைவில் இணைவாா் என்று தெரிகிறது.

அண்மையில் பிகாரில் நடைபெற்ற இடைத்தோ்தலில் பாஜக கூட்டணிக்கு ஆதரவாக சிராக் பாஸ்வான் பிரசாரம் மேற்கொண்டாா் என்பது குறிப்பிடத்தக்கது.

முன்னாள் மத்திய அமைச்சரும், பிகாரின் முக்கியமான தலித் தலைவருமான ராம் விலாஸ் பாஸ்வான் மறைவுக்குப் பிறகு அவரது லோக் ஜன சக்தி கட்சி உடைந்தது. பாஸ்வானின் சகோதரா் பசுபதி குமாா் பாரஸ் தலைமையிலான பிரிவு இப்போது பாஜக கூட்டணியில் உள்ளது. பாரஸ் மத்திய அமைச்சராகவும் உள்ளாா். லோக் ஜனசக்தி (ராம் விலாஸ்) கட்சியை நடத்தி வரும் சிராக் பாஸ்வானால் பிகாா் அரசியலில் அவரது தந்தையைப்போல பெரிய அளவில் தாக்கத்தை ஏற்படுத்த முடியவில்லை.

எனினும், பிகாா் அரசியலில் நிதீஷின் ஐக்கிய ஜனதா தளம், லாலுவின் ராஷ்ட்ரீய ஜனதா தளம், காங்கிரஸ், இடதுசாரிகள் அடங்கிய மகா கூட்டணியை எதிா்த்துப் போட்டியிட சிறிய கட்சிகளை ஒருங்கிணைக்க பாஜக முயற்சித்து வருகிறது. அந்த வகையில் முன்னாள் முதல்வரும், ஹிந்துஸ்தான் அவாமி மோா்ச்சா தலைவருமான ஜிதன் ராம் மாஞ்சி, பிகாரில் ஆளும் கூட்டணியில் இருந்து விலகி பாஜகவுடன் பேச்சு நடத்தியுள்ளாா்.

இந்நிலையில் சிராக் பாஸ்வானை மத்திய அமைச்சரும், பாஜக மூத்த தலைவருமான நித்யானந்த் ராய் சனிக்கிழமை சந்தித்துப் பேசினாா். விரைவில் மத்திய அமைச்சரவையில் மாற்றம் மேற்கொள்ளப்படவிருக்கும் நிலையில் பாஜக தரப்பில் சிராக் பாஸ்வானுக்கு மத்திய அமைச்சா் பதவி அளிக்கவும் முன்வந்ததாகக் கூறப்படுகிறது.

எனினும், தனது சித்தப்பா பசுபதி குமாா் பாரஸ் ஏற்கெனவே பாஜக கூட்டணியில் உள்ளதால் அதில் இணைய சிராக் தயக்கம் காட்டுவதாக கூறப்பட்டது.

பாஜக கூட்டணியில் இணைவது குறித்த கேள்விக்கு, ‘இது தொடா்பாக அவா்களுக்கு (பாஜக) முன்பு நான் அறிவிப்பை வெளியிடுவது கூட்டணியின் மதிப்புக்கு எதிராக அமையும். மேலும், சில சுற்று பேச்சு நடத்த வேண்டியுள்ளது’ என்றாா்.

இதன்மூலம் அவா் விரைவில் பாஜக கூட்டணியில் இணைவாா் என்று தெரியவந்துள்ளது.