தேர்தல் நடைபெறும் ஐந்து மாநிலங்களில் ரூ.1760 கோடி மதிப்பிலான பொருட்கள் பறிமுதல் செய்யப்பட்டதாக தேர்தல் ஆணையம் அறிவித்துள்ளது.

சத்தீஸ்கர், மத்தியப் பிரதேசம், மற்றும் மிசோரம் ஆகிய மாநிலங்களில் சமீபத்தில் சட்டப்பேரவை தேர்தல் வாக்குப்பதிவு நடைபெற்றது. மேலும் தெலங்கானா மற்றும்  ராஜஸ்தான் மாநிலங்களில் தேர்தல் நடைபெற உள்ளது. 

இந்த ஐந்து மாநிலங்களில் தேர்தல் தேதிகள் அக்டோபர் 9 அன்று இந்திய தேர்தல் ஆணையத்தால் அறிவிக்கப்பட்டது. அதனையடுத்து பிரதான கட்சிகள் தீவிர பிரசாரத்தில் ஈடுபட்டு வந்தன. 

தேர்தல் அறிவிக்கப்பட்டது முதல் தற்போது வரை பல்வேறு அரசியல் கட்சிகளால் வாக்காளர்களுக்கு கொடுப்பதற்காக கொண்டு செல்லப்பட்ட ரூ.1760 கோடி மதிப்புள்ள பரிசுப் பொருட்கள், மது உள்ளிட்ட போதைப் பொருட்கள், பணம் ஆகியவை தேர்தல் ஆணையத்தால் பறிமுதல் செய்யப்பட்டது.

இதையும் படிக்க: உலகக்கோப்பை இறுதிப்போட்டிக்கு கபில்தேவ் அழைக்கப்படாதது குறித்து எதிர்க்கட்சிகள் விமர்சனம்!

இந்தத் தகவலை இந்தியத் தேர்தல் ஆணையம் திங்கள்கிழமை அறிவித்தது. இந்த ஐந்து மாநிலங்களில் 2018-ஆம் ஆண்டு நடைபெற்ற தேர்தலின் போது ரூ.239 கோடி பறிமுதல் செய்யப்பட்டதாக தெரிவிக்கப்பட்டது.

அதைவிட இந்தத் தேர்தலில் 7 மடங்கு அதிகமாக பரிசுப் பொருட்கள், மது, பணம் உள்ளிட்டவை பறிமுதல் செய்யப்பட்டுள்ளது என்று தேர்தல் ஆணையம் தெரிவித்துள்ளது.