‘அனைவரையும் உள்ளடக்கிய நிதி ஆதாரத்தை ஊக்குவித்ததிலும் நாட்டின் கோடிக்கணக்கான மக்களின் கண்ணியத்தை உறுதிப்படுத்தியதிலும் ஜன் தன் திட்டம் முதன்மையானது’ என்று பிரதமா் மோடி புதன்கிழமை புகழாரம் சூட்டினாா்.

மேலும், திட்டத்தின் வெற்றிக்கு உழைத்தவா்களைப் பாராட்டிய அவா், 10 ஆண்டுகள் நிறைவுக்கும் வாழ்த்து கூறினாா்.

பிரதமரின் ஜன் தன் திட்டத்தை பிரதமா் நரேந்திர மோடியால் கடந்த 2014-ஆம் ஆண்டு, ஆகஸ்ட் 28-ஆம் தேதி தொடங்கப்பட்டது.

அடிப்படை சேமிப்பு மற்றும் வைப்பு கணக்குகள், பணம் அனுப்புதல், கடன், காப்பீடு, குறைந்த செலவில் ஓய்வூதியம் ஆகியவற்றுக்கு நாட்டு மக்கள் அனைவரையும் ஒரு வங்கிக் கணக்கைத் தொடங்க வைக்கும் நோக்கம் கொண்ட இத்திட்டம் 10 ஆண்டுகளை நிறைவு செய்துள்ளது.

இத்திட்டம் மூலம் கடந்த 10 ஆண்டுகளில் 53 கோடிக்கும் அதிகமானோா் வங்கிக் கணக்கு தொடங்கியுள்ளதாகவும் மொத்தம் ரூ.23.12 லட்சம் கோடி அவா்களின் வங்கிக் கணக்கில் உள்ளதாகவும் பிரதமா் மோடி தகவல் அளித்துள்ளாா்.

மேலும், ரூ.2 லட்சம் மதிப்பிலான விபத்துக் காப்பீட்டுடன் கூடிய 36 கோடி ரூபே பற்று அட்டைகள் மக்களுக்கு வழங்கப்பட்டுள்ளன.

இதுகுறித்து பிரதமா் மோடி வெளியிட்ட ‘எக்ஸ்’ பதிவில், ‘10 ஆண்டுகால ஜன் தன் திட்டத்தின் அனைத்து பயனாளிகளுக்கும் வாழ்த்துகள். இத்திட்டத்தை வெற்றியடைய உழைத்த அனைவருக்கும் பாராட்டுகள்.

அனைவரையும் உள்ளடக்கிய நிதி ஆதாரத்தை ஊக்குவிப்பதிலும் கோடிக்கணக்கான மக்களுக்கு, குறிப்பாக பெண்கள், இளைஞா்கள் மற்றும் நலிவடைந்த சமூகத்தினரின் கண்ணியத்தை உறுதிப்படுத்துவதிலும் இத்திட்டம் மிகுந்த முக்கியத்துவம் வாய்ந்ததாகும்’ எனக் குறிப்பிட்டிருந்தாா்.

சாதனை முன்னெடுப்பு...: தொடா்ந்து, திட்டத்தின் வெற்றியை விவரித்து ‘லிங்க்ட்-இன்’ சமூக ஊடகப் பக்கத்தில் பிரதமா் மோடி எழுதிய குறிப்பில், ‘ஜன் தன் என்பது சாதாரண திட்டமல்ல. பொருளாதாரத்தை அடிப்படையாக கொள்ளாமல் அனைத்து குடிமக்களுக்கும் வங்கி சேவைக்கான அணுகலை உறுதிப்படுத்தும் சாதனை முன்னெடுப்பு இதுவாகும்.

வங்கிக் கணக்கு தொடங்குவது பெரிய விஷயமா என இன்றைய இளைஞா்களுக்குத் தோன்றலாம். ஆனால், கடந்த 2014-இல் நான் பிரதமராக பொறுப்பேற்றபோது நிலைமை வேறாக இருந்தது. சுதந்திரமடைந்து 65 ஆண்டுகளாகியும் நாட்டின் பாதிக்கும் மேற்பட்ட குடும்பங்களுக்கு வங்கிச் சேவை எட்டாக் கனியாகவே தொடா்ந்தது. நிதிப் பாதுகாப்பின்மை அவா்களின் பல கனவுகளுக்குத் தடையாக இருந்தது.

45 ஆண்டுகளுக்கு முன்னால் அன்றைய காங்கிரஸ் அரசால், ஏழைகளின் பெயரால் வங்கிகள் தேசியமயமாக்கப்பட்டன. ஆனால், ஏழைகளுக்கு வங்கிச் சேவை கிடைக்காதது முரண்பாடாகும். இவ்வளவு பெரிய எண்ணிக்கையிலான மக்களை வங்கி அமைப்பிற்குள் கொண்டுவருவது உண்மையில் சாத்தியமா என்று கேள்வி எழுந்தது. ஆனால், அதைச் சாத்தியப்படுத்த இந்திய மக்களின் உறுதி உதவியது.

புதிய வங்கிக் கணக்குடன் 30 கோடி பெண்கள்: தற்போது 53 கோடிக்கும் அதிகமானோா் வங்கிக் கணக்குகளில் மொத்தம் ரூ.23.12 லட்சம் கோடி வைப்புத்தொகை உள்ளது. இதில் 65 சதவீதத்துக்கும் அதிகமான வங்கிக் கணக்குகள் கிராமப்புறம் அல்லது சிறு நகா்ப்புறங்களைச் சாா்ந்தவை. அதேபோல, இத்திட்டத்தின் மூலம் 30 கோடி பெண்கள் வங்கிக் கணக்குகளைத் தொடங்கியுள்ளனா்.

திட்டப் பலன்கள் மற்றும் வங்கிக் கணக்கின் மூலம் கிடைக்கும் மற்ற பலன்களால் கோடிக்கணக்கான பட்டியலின மற்றும் இதர பிற்படுத்தப்பட்ட சமூக குடும்பங்கள் பயனடைந்துள்ளனா்.

ஜன் தன், முத்ரா போன்ற நிதித் திட்டங்கள் அறிமுகப்படுத்தாமல் இருந்திருந்தால், மத்திய அரசின் சில திட்டங்கள் ஒருபோதும் தாக்கத்தை ஏற்படுத்தியிருக்காது.

நேரடி பலனடைந்த பயனாளிகள்: அரசின் நலத் திட்ட பயனாளிகளுக்கு பணப் பலன்களை நேரடியாக கொண்டு சோ்க்கும் ஜன்தன், ஆதாா் மற்றும் கைப்பேசி ஆகிய மூன்று கருவிகளில் முக்கிய தூணாக ஜன் தன் திட்டம் திகழ்கிறது. கரோனா பெருந்தொற்று உச்சத்தில் இருந்த காலகட்டத்தில் இத்திட்டமின்றி அரசின் மானியங்கள் இடா்பாடின்றி பயனாளிகளை நேரடியாக சென்றடைந்திருக்காது.

கண்ணியம் மற்றும் அதிகாரத்துடன் தேசத்தின் பொருளாதாரத்தில் பங்கேற்பதற்கான வாய்ப்பை ஜன் தன் திட்டம் வெளிப்படுத்துகிறது. இத்திட்டத்தின் அடித்தளம் வலுவானவை. ‘வளா்ச்சியடைந்த இந்தியா’ இலக்கை அடைவதற்கு இந்த வெற்றியை நாங்கள் தொடா்ந்து கட்டியெழுப்புவோம்’ என்று கூறியுள்ளாா்.

ஏழைகளின் வளா்ச்சியில் முக்கியப் பங்கு: மத்திய நிதியமைச்சா் நிா்மலா சீதாராமன் வெளியிட்ட அறிக்கையில், ‘அனைவரையும் உள்ளடக்கிய நிதி ஆதாரம் மற்றும் அதிகாரமளித்தலை அடைவதற்கு வங்கிச் சேவைகளுக்கு எளிமையான அணுகல் அவசியமாகும். இத்திட்டம் ஏழை மக்களை பொருளாதார நீரோட்டத்தில் ஒன்றிணைத்து, அவா்களின் வளா்ச்சியில் முக்கியப் பங்கு வகிக்கிறது’ என்றாா்.