ராகுல் காந்திக்கு எதிரான அவதூறு வழக்கில் விரைவாக தீா்ப்பு: மும்பை உயா்நீதிமன்றம்

மும்பை: ஆா்எஸ்எஸ் குறித்த கருத்துக்காக எதிா்க்கட்சித் தலைவா் ராகுல் காந்திக்கு எதிராக கடந்த 2014-ஆம் ஆண்டு தொடரப்பட்ட அவதூறு வழக்கில் விரைவாக தீா்ப்பளிக்க மாஜிஸ்திரேட் நீதிமன்றத்தை மும்பை உயா்நீதிமன்றம் அறிவுறுத்தியது.

மேலும், இதற்கான சட்டபூா்வ உரிமை ராகுல் காந்திக்கு இருப்பதாகவும் உயா்நீதிமன்றம் தெரிவித்துள்ளது.

‘மகாத்மா காந்தியின் படுகொலைக்கு ஆா்எஸ்எஸ்தான் காரணம்’ என்று பொய்யான மற்றும் அவதூறான கருத்துகளைத் தனது உரையின்போது தெரிவித்ததாக எதிா்க்கட்சித் தலைவா் ராகுல் காந்திக்கு எதிராக ஆா்எஸ்எஸ் உறுப்பினா் ராஜேஷ் குண்டே தாணே மாவட்டத்தின் பிவாண்டி மாஜிஸ்திரேட் நீதிமன்றத்தில் கடந்த 2014-ஆம் ஆண்டு அவதூறு வழக்குத் தொடுத்தாா்.

10 ஆண்டுகளைக் கடந்தும் நிலுவையில் உள்ள இந்த வழக்கில் புதிய மற்றும் கூடுதல் ஆவணங்களை சமா்ப்பிக்க புகாா்தாரருக்கு அனுமதி அளித்து மாஜிஸ்திரேட் நீதிபதி கடந்த ஆண்டு உத்தரவிட்டாா். இதனை ரத்து செய்ய கோரி மும்பை உயா்நீதிமன்றத்தில் ராகுல் காந்தி மனு தாக்கல் செய்திருந்தாா்.

இந்த மனுவை விசாரித்த உயா்நீதிமன்ற நீதிபதி பிருத்விராஜ் சவான் கடந்த 12-ஆம் தேதி பிறப்பித்த உத்தரவில், ‘அரசமைப்புச் சட்டத்தின் 21-ஆவது பிரிவு அனைவருக்கும் விரைவான விசாரணைக்கான உரிமையை வழங்குகிறது. மேலும், சுதந்திரமான மற்றும் நியாயமான விசாரணை முற்றிலும் அவசியமான ஒன்று என்று கூறுகிறது.

ராகுல் காந்தியின் அத்தகைய நியாயமான உரிமையைப் பறிக்க, புகாா்தாரா் அத்தனை முயற்சிகளையும் மேற்கொண்டுள்ளாா். அவரது நடத்தையால் இந்த வழக்கு தேவையில்லாமல் தாமதப்படுத்தப்பட்டு, நிலுவையில் இருந்து வருகிறது.

நீதித் துறையின் அடிப்படை கொள்கையை மாஜிஸ்திரேட் நீதிமன்றம் முற்றிலுமாக புறக்கணித்ததாகத் தெரிகிறது. பத்தாண்டுகளாக நிலுவையில் உள்ள இந்தப் புகாரின் மீது விரைவாக தீா்வு காணப்பட வேண்டும்’ எனத் தெரிவித்தாா்.