புது தில்லி: மத்திய பட்ஜெட்டில் எந்த மாநிலத்துக்கும் நிதி மறுக்கப்படவில்லை என்று மக்களவையில் மத்திய நிதியமைச்சா் நிா்மலா சீதாராமன் விளக்கமளித்தாா். ஒரு மாநிலத்தின் பெயரை பட்ஜெட் உரையில் கூறவில்லை என்றால் அந்த மாநிலத்துக்கு நிதி ஒதுக்கப்படவில்லை என்று அா்த்தமில்லை எனவும் அவா் கூறினாா்.

மத்திய பட்ஜெட்டில் பாஜக கூட்டணிக் கட்சிகள் ஆட்சியில் உள்ள ஆந்திரம், பிகாருக்கு அதிக நிதியுதவி அறிவிப்புகள் வெளியாகின. இதை முன்வைத்து எதிா்க்கட்சிகள் ஆளும் மாநிலங்களுக்கு நிதி ஒதுக்காமல் மத்திய அரசு புறக்கணிப்பதாக எதிா்க்கட்சிகள் குற்றஞ்சாட்டின. மேலும், பாஜக மற்றும் அதன் கூட்டணிக் கட்சிகள் ஆளும் மாநிலங்களுக்கு மட்டும் நிதி ஒதுக்குவதாக போராட்டமும் முன்னெடுக்கப்பட்டது.

இந்நிலையில், மக்களவையில் பட்ஜெட் உரைக்கு பதிலளித்து நிா்மலா சீதாராமன் செவ்வாய்க்கிழமை பேசியதாவது:

காங்கிரஸ் கூட்டணி ஆட்சிக் காலத்தில் நிகழ்த்தப்பட்ட பட்ஜெட் உரைகளில் இருந்தே உதாரணம் கூறுகிறேன். 2004-05 பட்ஜெட்டில் 17 மாநிலங்களின் பெயா்கள் பட்ஜெட் உரையில் இடம் பெறவில்லை. இதனால், அப்போது அந்த மாநிலங்களுக்கு மத்திய அரசு பட்ஜெட்டில் நிதி ஒதுக்காமல் இருந்ததா? இல்லை ஒதுக்கிய அதிக நிதியை நிறுத்தி வைத்தீா்களா?.

உண்மையில் பட்ஜெட் உரை குறித்து தவறான தகவல்களை எதிா்க்கட்சிகள் பரப்ப முயலுகிறாா்கள். மத்திய பட்ஜெட்டில் எந்த மாநிலத்துக்கும் நிதி மறுக்கப்படவில்லை. ஒரு மாநிலத்தின் பெயரை பட்ஜெட் உரையில் கூறவில்லை என்றால் அந்த மாநிலத்துக்கு நிதி ஒதுக்கப்படவில்லை என்று அா்த்தமில்லை.

இந்தியா வேகமாக வளா்ந்து வரும் பொருளாதாரத்தைக் கொண்டுள்ளது. கரோனா தொற்றால் ஏற்பட்ட பொருளாதார பாதிப்பு உள்பட பல்வேறு சிக்கல்கள், பல நெருக்கடிகளைக் கடந்து நிதிப் பற்றாக்குறையைக் குறைத்துள்ளோம். இந்த ஆண்டு ஜம்மு-காஷ்மீா் யூனியன் பிரதேசத்துக்கு மட்டும் ரூ.17,000 கோடி ஒதுக்கியுள்ளோம். இதில் பெருமளவு நிதி மாநில காவல் துறைக்கு ஒதுக்கப்பட்டுள்ளது என்றாா்.

திரிணமூல் வெளிநடப்பு: நிா்மலா சீதாராமன் உரைக்கு நடுவே, மகாத்மா காந்தி தேசிய ஊரக வேலைவாய்ப்புத் திட்டம் குறித்து வெள்ளை அறிக்கை வெளியிட வலியுறுத்தி திரிணமூல் காங்கிரஸ் எம்.பி.க்கள் வெளிநடப்பு செய்தனா்.