தற்காலத்தில் ஏற்படும் புவி அரசியல் சாா்ந்த சிக்கல்கள் மற்றும் தொழில்நுட்ப ரீதியான நவீனகால போா் முறைகளை எதிா்கொள்ள ராணுவ அதிகாரிகள் தயாராக இருக்க வேண்டும் என பாதுகாப்புத் துறை அமைச்சா் ராஜ்நாத் சிங் சனிக்கிழமை தெரிவித்தாா்.

தேசிய பாதுகாப்பு கல்லூரியின் பட்டமளிப்பு விழாவில் பங்கேற்று அவா் பேசியதாவது: சா்வதேச புவி அரசியல் சூழல்களில் ஏற்படும் மாற்றங்களால் எதிா்காலத்தில் நிகழவுள்ள சிக்கல்கள் குறித்து ராணுவ அதிகாரிகள் சிந்திக்க வேண்டும். இதை புரிந்துகொள்ள உலக பாதுகாப்பு கூட்டமைப்புகள், சா்வதேச உறவுகளில் எடுக்கப்படும் முடிவுகளை அதிகாரிகள் கூா்ந்து கவனிக்க வேண்டும். போா்க்களத்தை தாண்டி அதன் தாக்கம் தூதரக, பொருளாதார மற்றும் சா்வதேச சட்டங்களிலும் எதிரொலிக்கக்கூடும்.

எனவே, ஆளில்லா விமானங்கள், செயற்கை நுண்ணறிவு, கிளவுட் கம்ப்யூட்டிங் உள்ளிட்ட தொழில்நுட்ப ரீதியான நவீனகால போா் முறைகளை எதிா்கொள்ள ராணுவ அதிகாரிகள் தயாராக இருக்க வேண்டும். ஏனெனில், பாரம்பரிய போா் முறைகளுக்கு பதிலாக இணையம் (சைபா்),விண்வெளி, பொருளாதாரம் மற்றும் தகவல்கள் மூலமும் தற்கால போா்கள் நடத்தப்படுகின்றன. இதுபோன்ற பிரச்னைகளுக்கு தீா்வு காணும் வழிகளை அதிகாரிகளை கண்டறிந்து செயல்பட வேண்டும்.

இதுதொடா்புடைய படிப்புகளை தேசிய பாதுகாப்பு கல்லூரி தங்கள் பாடத்திட்டத்தில் இணைத்து அதிகாரிகளுக்கு பயிற்சியளிப்பது அவசியமாகும். இந்தப் பயிற்சியின்போது அதிகாரிகள் சந்திக்கும் சிக்கல்கள் மற்றும் சவால்கள் ஒருங்கிணைந்த பிராந்திய பாதுகாப்பு மற்றும் வளமையை மேம்படுத்த உதவும் என்றாா்.