பிகாா் வாக்காளா் பட்டியல் சிறப்பு தீவிர திருத்தப் பணிக்கு எதிா்ப்பு தெரிவித்து, நாடாளுமன்றத்தில் எதிா்க்கட்சிகள் வெள்ளிக்கிழமையும் அமளியில் ஈடுபட்டன. இதனால், இரு அவைகளும் எந்த அலுவலும் இன்றி முடங்கின.

இனி நாடாளுமன்றம் திங்கள்கிழமை (ஆக.4) மீண்டும் கூடுமென தெரிவிக்கப்பட்டுள்ளது.

அடுத்த சில மாதங்களில் பேரவைத் தோ்தல் நடைபெறவுள்ள பிகாரில் தோ்தல் ஆணையம் மேற்கொண்டுவரும் வாக்காளா் பட்டியல் சிறப்பு தீவிர திருத்தப் பணியை உடனடியாக நிறுத்த வேண்டுமென எதிா்க்கட்சிகள் வலியுறுத்தி வருகின்றன. இது குறித்து நாடாளுமன்றத்தில் விவாதம் நடத்தக் கோரி, எதிா்க்கட்சி எம்.பி.க்கள் தொடா்ந்து அமளியில் ஈடுபட்டுள்ளனா்.

மழைக்கால கூட்டத் தொடரின் முதல் வாரத்தில் இருந்தே (ஜூலை 21-25) இந்த விவகாரம் பெரிய அளவில் எதிரொலித்து வருகிறது.

இந்நிலையில், மக்களவையில் வெள்ளிக்கிழமை காலை 11 மணியளவில் கூடியதும், பிகாா் வாக்காளா் பட்டியல் திருத்த விவகாரம் குறித்து விவாதம் கோரிய எதிா்க்கட்சி எம்.பி.க்கள், அவையின் மையப் பகுதியை முற்றுகையிட்டு கோஷமிட்டனா்.

அப்போது, திமுக மூத்த தலைவா் டி.ஆா்.பாலுவின் பெயரை குறிப்பிட்ட அவைத் தலைவா் ஓம் பிா்லா, ‘எதிா்க்கட்சிகளின் நடத்தை முறையற்றது; இவ்வாறு போராடுவது சரியா?’ என்று கேள்வியெழுப்பினாா். எம்.பி.க்கள் இருக்கைக்கு திரும்ப வேண்டுமென்ற அவரது கோரிக்கைக்கு பலன் கிடைக்காத நிலையில், மூன்றே நிமிஷங்களில் பிற்பகல் 2 மணிக்கு அவையை ஒத்திவைத்தாா். மீண்டும் கூடியபோதும், இதேநிலை காணப்பட்டதால், அவை திங்கள்கிழமைக்கு ஒத்திவைக்கப்பட்டது.

எம்.பி.க்களைத் தடுத்த பாதுகாவலா்கள்: மாநிலங்களவை வெள்ளிக்கிழமை காலையில் கூடியதும், பிகாா் வாக்காளா் பட்டியல் திருத்தம் உள்பட பல்வேறு விவகாரங்கள் குறித்து விவாதிக்க விதி எண் 267-இன்கீழ் அளிக்கப்பட்ட 30 நோட்டீஸ்களும் நிராகரிக்கப்படுவதாக துணைத் தலைவா் ஹரிவன்ஷ் தெரிவித்தாா்.

பிகாா் வாக்காளா் பட்டியல் விவகாரம் நீதிமன்ற விசாரணையில் உள்ளதால், இது தொடா்பான விவாதத்துக்கு அனுமதி வழங்க முடியாது என்று அவா் தெரிவித்தாா். ஆனால், எதிா்க்கட்சிகள் தொடா்ந்து கோஷமிட்டதால், அவை மதியம் 12 மணிக்கு ஒத்திவைக்கப்பட்டது.

மீண்டும் கூடியபோது, அவையின் மையப் பகுதியில் முற்றுகையிடச் சென்ற திமுக, திரிணமூல் காங்கிரஸ் உள்ளிட்ட எதிா்க்கட்சி எம்.பி.க்களை பாதுகாவலா்கள் தடுத்தனா். எனினும், அவா்களிடம் இருந்து விடுபட்டு, அவையின் மையப் பகுதியில் எம்.பி.க்கள் முற்றுகையிட்டனா். தாங்கள் தடுக்கப்பட்டதற்கு எதிராக முழக்கமிட்டனா். கூச்சல்-குழப்பம் நீடித்ததால், அவை அலுவல்கள் திங்கள்கிழமைக்கு ஒத்திவைக்கப்பட்டன.

அவைக்குள் சிஐஎஸ்எஃப் படையினா்: காா்கே கண்டனம்

மாநிலங்களவையில் தங்களின் ஜனநாயக உரிமையைப் பயன்படுத்தி எதிா்க்கட்சி எம்.பி.க்கள் வெள்ளிக்கிழமை போராட்டத்தில் ஈடுபட்டபோது, மத்திய தொழிலக பாதுகாப்புப் படையினா் (சிஐஎஸ்எஃப்) அவையின் மையப் பகுதி வரை வந்து தடுத்ததாக எதிா்க்கட்சித் தலைவா் மல்லிகாா்ஜுன காா்கே குற்றஞ்சாட்டியுள்ளாா்.

இது தொடா்பாக மாநிலங்களவை துணைத் தலைவா் ஹரிவன்ஷுக்கு அவா் எழுதியுள்ள கடிதத்தில், ‘சிஐஎஸ்எஃப் படையினா் அவையின் மையப் பகுதி வரை வரவழைக்கப்பட்ட விதம் அதிா்ச்சியளிக்கிறது. மக்கள் நலனுக்காக தங்களின் ஜனநாயக உரிமையை எதிா்க்கட்சிகள் பயன்படுத்தும்போது, இதுபோல் சிஎஸ்ஐஎஃப் படையினா் அவையின் உள்ளே வராமல் இருப்பதை நீங்கள் உறுதி செய்ய வேண்டும்’ என்று அவா் வலியுறுத்தியுள்ளாா்.