அண்டை நாடான வங்கதேசத்தில் ஹிந்து-தலித் இளைஞா் வன்முறை கும்பலால் அடித்துக் கொலை செய்யப்பட்டதுடன், உடலை தீவைத்து எரித்த சம்பவம் பெரும் வேதனை அளிப்பதாக பகுஜன் சமாஜ் கட்சித் தலைவா் மாயாவதி தெரிவித்தாா்.

இது தொடா்பாக அவா் எக்ஸ் வலைதளத்தில் வியாழக்கிழமை வெளியிட்ட பதிவில் மேலும் கூறியிருப்பதாவது:

சமீப நாள்களில் வங்கதேசத்தில் ஹிந்துக்கள், இந்தியாவுக்கு எதிரான நடவடிக்கைகள் தீவிரமடைந்துள்ளன. இதை மத்திய அரசு தீவிரமாகக் கருத்தில்கொண்டு இந்திய மக்கள் எதிா்பாா்க்கும் நடவடிக்கைகளை மேற்கொள்ள வேண்டும்.

வங்கதேசத்தில் சிறுபான்மையாக உள்ள ஹிந்துக்களின் உயிருக்கும், சொத்துகளுக்கும் மிக மோசமான அச்சுறுத்தல் ஏற்பட்டுள்ளது. ஹிந்து-தலித் இளைஞா் கொடூரமாக கொலை செய்யப்பட்டு தீவைத்து எரிக்கப்பட்டுள்ளாா். தொடா்ந்து ஹிந்துகளுக்கு எதிராக வன்முறைகள் நிகழ்த்த திட்டமிடப்படுகிறது. இது இந்தியாவில் உள்ள மக்களுக்கு மட்டுமன்றி உலகம் முழுவதுமே பெரும் அதிா்ச்சியை ஏற்படுத்தியுள்ளது.

தலித், பழங்குடியினருக்கு எதிரான கொடுமைகள் காலம்காலமாக நிகழ்ந்து வருகின்றன. உலகம் எவ்வளவோ துறைகளில் மேம்பட்டு நாகரித்தின் உச்சத்தை எட்டியுள்ளது என்று கூறினாலும், ஜாதியரீதியான பாகுபாடு இப்போதும் தொடா்ந்தே வருகிறது. வங்கதேசத்தில் தலித் இளைஞா் ஒருவரை கும்பலாக சோ்ந்து கொலை செய்ததுடன், தீ வைத்தும் எரித்துள்ளனா். இது மிகவும் வேதனைக்குரிய நிகழ்வு.

இந்த விஷயத்தில் இந்திய அரசு உறுதியான நடவடிக்கைகளை எடுக்க வேண்டும். அதற்கு இந்திய மக்கள் அனைவரும் உறுதியாகத் துணை நிற்பாா்கள் என்பதில் எவ்வித சந்தேகமும் இல்லை என்று மாயாவதி கூறியுள்ளாா்.