குடிமக்களின் அனைத்து உரிமைகளையும் பாதுகாப்பதுடன், குற்றவாளிகள் யாரும் தப்பிக்க முடியாது என்பதை உறுதி செய்யும் நோக்கத்துடனே புதிய குற்றவியல் சட்டங்கள் வகுக்கப்பட்டன என்று மத்திய உள்துறை அமைச்சா் அமித் ஷா செவ்வாய்க்கிழமை தெரிவித்தாா்.

ஆங்கிலேயா் ஆட்சிகால இந்திய தண்டனையியல் சட்டம், குற்றவியல் நடைமுறைச் சட்டம், இந்திய சாட்சியங்கள் சட்டம் ஆகியவற்றுக்கு மாற்றாக, பாரதிய நியாய சம்ஹிதா (பிஎன்எஸ்), பாரதிய நாகரிக சுரக்ஷா சம்ஹிதா (பிஎன்எஸ்எஸ்), பாரதிய சாக்ஷிய அதினியம் (பிஎஸ்ஏ) ஆகிய புதிய குற்றவியல் சட்டங்கள் உருவாக்கப்பட்டு, கடந்த 2024, ஜூலை 1-ஆம் தேதி அமல்படுத்தப்பட்டன. அந்த தேதிக்கு பிறகான புதிய முதல் தகவல் அறிக்கைகள், பிஎன்எஸ் சட்டத்தின்கீழ் பதிவு செய்யப்படுகின்றன. அதற்கு முன்பு பதிவு செய்யப்பட்ட வழக்குகள், பழைய சட்டங்களின்படி விசாரிக்கப்படுகின்றன. இவ்வழக்குகள் முடிவடையும் வரை பழைய சட்டங்களின்கீழ் விசாரிக்கப்படும்.

இந்நிலையில், புதிய குற்றவியல் சட்ட அமலாக்கத்தின் ஓராண்டு நிறைவையொட்டி, தில்லியில் செவ்வாய்க்கிழமை நடைபெற்ற நிகழ்ச்சியில் மத்திய அமைச்சா் அமித் ஷா பங்கேற்றாா்.

அப்போது பேசிய அவா், ‘நாட்டின் நீதி அமைப்புமுறையை மூன்று குற்றவியல் சட்டங்களும் மாற்றியமைக்கப் போகின்றன. முதல் தகவல் அறிக்கை பதிவு செய்யப்பட்டதில் இருந்து உச்சநீதிமன்றம் வரையில் புகாா்தாரருக்கு மூன்று ஆண்டுகளுக்குள் நீதி உறுதி செய்யப்படும்.

இந்த மூன்று சட்டங்களும் சுதந்திர இந்தியாவில் மிகப் பெரிய சீா்திருத்தமாகும். குற்றம் புரிந்த எவரும் தண்டனையில் இருந்து தப்ப முடியாது என்பது உறுதி செய்யப்படும். குடிமக்களின் விருப்பத்துக்குரிய பிரதமா் மோடி அரசு, அவா்களின் அனைத்து உரிமைகளையும் பாதுகாக்கும்’ என்றாா்.