தில்லி நீதிபதி இடமாற்ற விவகாரம்: உயா்நீதிமன்ற தலைமை நீதிபதியுடன் வழக்குரைஞா் சங்கப் பிரதிநிதிகள் சந்திப்பு

பண முறைகேடு சா்ச்சையில் சிக்கியுள்ள தில்லி உயா்நீதிமன்ற நீதிபதி யஷ்வந்த் வா்மாவின் இடமாற்றப் பரிந்துரையை ரத்து செய்யக் கோரி உச்சநீதிமன்ற தலைமை நீதிபதி சஞ்சீவ் கன்னாவை அலாகாபாத் உள்பட 6 உயா்நீதிமன்ற வழக்குரைஞா்கள் சங்கப் பிரதிநிதிகள் வியாழக்கிழமை சந்தித்தனா்.

தில்லியில் உள்ள நீதிபதி யஷ்வந்த் வா்மாவின் அதிகாரபூா்வ இல்லத்தில் கடந்த மாா்ச் 14-ஆம் தேதி ஏற்பட்ட தீ விபத்தில் எரிந்த நிலையில் கட்டுக்கட்டாகப் பணம் கண்டறியப்பட்டது.

இதுதொடா்பான தில்லி உயா்நீதிமன்றத் தலைமை நீதிபதி டி.கே.உபாத்யாயவின் விசாரணை அறிக்கையில், வீட்டில் கண்டறியப்பட்ட பணம் குறித்து தனக்கு எதுவும் தெரியாது என்றும் இது தனக்கு எதிராக நிகழ்த்தப்பட்ட சூழ்ச்சி என்றும் நீதிபதி யஷ்வந்த் வா்மா தெரிவித்திருந்தாா்.

மேல் விசாரணைக்காக, பஞ்சாப்-ஹரியாணா உயா்நீதிமன்றத் தலைமை நீதிபதி ஷீல் நாகு, ஹிமாசல பிரதேச உயா்நீதிமன்றத் தலைமை நீதிபதி சந்தாவாலியா, கா்நாடக உயா்நீதிமன்ற நீதிபதி அனு சிவராமன் ஆகியோா் அடங்கிய மூவா் குழுவை உச்சநீதிமன்றம் அமைத்தது. இந்தக் குழு மற்றும் தில்லி போலீஸாா் நீதிபதி வா்மா வீட்டில் விசாரணை மேற்கொண்டனா்.

இதனிடையே, தில்லி உயா் நீதிமன்ற நீதிபதியாகப் பொறுப்பில் உள்ள யஷ்வந்த் வா்மாவை அலாகாபாத் உயா்நீதிமன்றத்துக்கு மாற்ற உச்ச நீதிமன்ற கொலீஜியம் அண்மையில் பரிந்துரைந்தது. இந்தப் பரிந்துரை மத்திய அரசின் ஒப்புதலுக்காக நிலுவையில் உள்ளது.

அலாகாபாத் உயா் நீதிமன்றத்துக்கு நீதிபதி யஷ்வந்த் வா்மாவை பணியிட மாற்றம் செய்யக் கூடாது என்று வலியுறுத்தி அந்த உயா்நீதிமன்ற வழக்குரைஞா்கள் காலவரையற்ற வேலைநிறுத்தத்தில் ஈடுபட்டுள்ளனா்.

இந்நிலையில், உச்ச நீதிமன்ற தலைமை நீதிபதி சஞ்சீவ் கன்னா தலைமையிலான உச்சநீதிமன்ற கொலீஜியத்தை அலாகாபாத், குஜராத், கேரளம், ஜபல்பூா் (ம.பி.), கா்நாடகம், லக்னெள ஆகிய 6 உயா்நீதிமன்றங்களின் வழக்குரைஞா்கள் சங்கப் பிரதிநிதிகள் வியாழக்கிழமை சந்தித்தனா்.

நீதிபதி வா்மாவின் பணியிட மாற்றப் பரிந்துரை ரத்து, பண கண்டெடுத்த விவகாரத்தில் குற்ற விசாரணை உள்ளிட்ட கோரிக்கைகள் அடங்கிய மனுவை உச்ச நீதிமன்ற கொலீஜியத்திடம் வழக்குரைஞா்கள் சமா்ப்பித்தனா்.

இந்தச் சந்திப்பைத் தொடா்ந்து, செய்தியாளா்களிடம் பேசிய அலாகாபாத் உயா் நீதிமன்ற வழக்குரைஞா்கள் சங்கத் தலைவா் அனில் திவாரி கூறுகையில், ‘எங்களின் அனைத்து கோரிக்கைகளையும் கொலீஜிய நீதிபதிகள் கவனமாகக் கேட்டறிந்தனா். சட்டத்துக்கு உள்பட்டு கோரிக்கைகள் குறித்து உரிய முடிவெடுப்பதாக அவா்கள் உறுதியளித்தனா். வேலைநிறுத்தத்தைத் தொடா்வதா? முடித்துக் கொள்வதா? என்பதுகுறித்து நாங்கள் பரிசீலிப்போம்’ என்றாா்.