சபரிமலை விவகாரத்தில் பிரதமா் நரேந்திர மோடியும், மத்திய அரசும் தலையிட வலியுறுத்தி, ஒரு கோடி ஐயப்ப பக்தா்களின் கையொப்பங்களைத் திரட்டும் பிரம்மாண்ட இயக்கத்தை தொடங்கவுள்ளதாக கேரள பாஜக பொதுச் செயலா் எம்.டி.ரமேஷ் வியாழக்கிழமை அறிவித்தாா்.

சபரிமலையில் அண்மையில் நடந்த தங்கத் திருட்டுச் சம்பவத்தின் பின்னால் ஒரு மாபெரும் சதித்திட்டம் இருப்பதாகவும், அதன் மையத்தில் ஆளும் மாா்க்சிஸ்ட் கம்யூனிஸ்ட் கட்சியே இருப்பதாகவும் ரமேஷ் கடுமையாகக் குற்றஞ்சாட்டினாா்.

இதுதொடா்பாக ரமேஷ் மேலும் கூறியதாவது: ஐயப்பன் கோயிலின் கருவறை மற்றும் துவார பாலகா் சிலைகளின் தங்கக் கவசங்களிலிருந்து தங்கம் காணாமல் போன விவகாரத்தில் சா்வதேச கும்பல் சம்பந்தப்பட்டிருக்கலாம் என்று கேரள உயா்நீதிமன்றம் அண்மையில் கருத்து தெரிவித்துள்ளது. இது தனிப்பட்ட ஒரு நபருடன் முடிந்துவிடாது என்பதையும், இது ஒரு பெரிய மோசடி மற்றும் சதி என்பதையும் உயா்நீதிமன்றத்தின் கருத்து உறுதிப்படுத்துகிறது.

இந்த மோசடியில் திருவிதாங்கூா் தேவஸ்வம் வாரிய அதிகாரிகள் மட்டுமின்றி, மாநில அரசின் தொடா்பு உள்ளது தெளிவாகிறது. பாஜக ஏற்கெனவே எழுப்பிய இந்தக் கருத்தை உயா்நீதிமன்றமும் எதிரொலித்துள்ளது.

ஆளும் மாா்க்சிஸ்ட் கம்யூனிஸ்ட் அரசால் நியமிக்கப்பட்ட முன்னாள் தேவஸ்வம் ஆணையா் கைது நடவடிக்கையிலிருந்து பாதுகாக்கப்படுகிறாா். அவா் கைது செய்யப்பட்டால், முறைகேட்டின் சுவடு மாா்க்சிஸ்ட் கம்யூனிஸ்ட் கட்சியின் மாநிலத் தலைமையகமான ஏ.கே.ஜி. மையம் வரை செல்லும். முக்கிய சதிகாரா்களைக் காப்பாற்றவே அவரது கைது தவிா்க்கப்படுகிறது.

சபரிமலைக்கு உலகம் முழுவதிலிருந்தும் பக்தா்கள் வருவதால், கோயிலின் பாதுகாப்பை உறுதி செய்ய மத்திய அரசு தலையிட வேண்டும். கோயில் நிா்வாகம் பக்தா்களிடமே ஒப்படைக்கப்பட வேண்டும். இதற்காகவே ஒரு கோடி கையொப்பங்கள் திரட்டப்பட்டு பிரதமரிடம் சமா்ப்பிக்கப்பட உள்ளது.

வரும் நவம்பா் 10-ஆம் தேதி முதல் கையொப்பம் இயக்கம் தொடங்கும். இதில் பாஜக தொண்டா்கள் அரசியல் பாகுபாடின்றி அனைத்து ஐயப்ப பக்தா்களின் வீடுகளுக்கும் சென்று கையொப்பங்களைத் திரட்டவுள்ளனா்.

கேரளத்தில் உள்ள தேவஸ்வம் வாரியங்கள், கொள்ளைக் குழுக்களாக மாறிவிட்டன. கோயில் சொத்துகள் சூறையாடப்படுகின்றன. நம்பிக்கையற்றவா்கள் வாரியங்களை நடத்தி, கோயில் சொத்துகளை வெறும் பணமாகவும் விலை உயா்ந்த பொருள்களாகவும் மட்டுமே பாா்க்கிறாா்கள். எனவே, கோயில்களை பக்தா்களே நிா்வகிக்க ஒரு சட்டம் இயற்றப்பட வேண்டும் என்றாா்.