நாட்டியாஞ்சலி விழாவை 10 நாட்கள் நடத்த வேண்டும்: ஆட்சியர் ஆர்.கிர்லோஷ்குமார்

சிதம்பம் நடராஜர் கோயிலில் நடைபெறும் நாட்டியாஞ்சலி விழாவை அதிகமான நடனக்கலைஞர்களை வரவழைத்து அடுத்த ஆண்டு முதல் 10 நாட்கள் நடத்த வேண்டும் என கடலூர் மாவட்ட ஆட்சியர் ஆர்.கிர்லோஷ்குமார் தெரிவித்தார்.

சிதம்பரம் ஸ்ரீநடராஜர் கோயிலில் கடந்த மார்ச் 10-ம் தேதி மகாசிவராத்திரியன்று 32-வது நாட்டியாஞ்சலி விழா தொடங்கி 5 நாட்கள் நடைபெற்றது. நாட்டியாஞ்சலி நிறைவு விழா வியாழக்கிழமை நடைபெற்றது. விழாவிற்கு செ.சி.குப்புசாமி தீட்சிதர் தலைமை வகித்தார். நாட்டியாஞ்சலி அறக்கட்டளை தலைவர் வழக்குரைஞர் ஏ.கே.நடராஜன் வரவேற்றார். விழாவில் கடலூர் மாவட்ட ஆட்சியர் ஆர்.கிர்லோஷ்குமார் சிறப்பு விருந்தினராக பங்கேற்று பேசினார். அவர் பேசியது: நாட்டியாஞ்சலியில் பங்கேற்று நாட்டியமாடுவது மிகப்பெரிய வாய்ப்பாகும். சுற்றுலா ஸ்தலமான சிதம்பரம் ஸ்ரீநடராஜர் கோயிலில் சிறந்த நாட்டியக் கலைஞர்களை கொண்டு நாட்டியாஞ்சலி நடத்தும் அறக்கட்டளை நிர்வாகிகளுக்கு பாராட்டு தெரிவித்துக் கொள்கிறேன் என ஆட்சியர் ஆர்.கிர்லோஷ்குமார் தெரிவித்தார்.